Që pesë muaj biblioteka Kombëtare e Kosovës “Pjetër Bogdani”refuzon zbatimin e vendimeve të MPB për korrigjim të pagave.

Kështu ka thënë Izet Abdyli, Menaxher i Personelit të BKK “Pjetër Bogdani” i nxitur nga mos zbatimi i vendimit pasi siç theksoi ka shterur të gjitha mundësitë ligjore me kërkesa të pareshtura drejtuar drejtorit të Bibliotekës për ekzekutimin e vendimit të Komisionit për korrigjim të pagave të Ministrisë së Punëve të Brendshme dhe konfirmimit zyrtar nga DMZP për korrigjim të pagave të punonjësve të Bibliotekës.

“Pa dashjen time jam i detyruar si Menaxher i Personeli të bëjë këtë reagim publik në mbrojtje të drejtave të 34 punonjësve të Bibliotekës. Në shkresën zyrtare të DMZP dërguar në fillim të tetorit vitit kaluar 34 punonjësve të Bibliotekës u janë korrigjuar pagat meqë rast sipas kategorive ka përfitime nga 22 euro në muaj kategoria më e ulët e deri në 168 euro në muaj kategoria më e lartë, që i bie që po të zbatohej ky vendim që pesë muaj( nga tetori) çdo punëtor do të përfitonte nga 120 euro deri në 840 euro”, tha ai.

Nisur nga përgjegjësia ligjore e profesionale Abdyli ka kërkuar disa herë nga Drejtori Bibliotekës dhe Shefi Divizionit të Financave që të ekzekutojnë këtë vendim të ligjshëm të DMZP, duke tërhequr vërejtjen si Menaxher Personeli të heqë përgjegjësinë ligjore për mosekzekutim të vendimit.

“Kjo kërkesë e imja nuk është përfillur deri tani. Të njëjtën kërkesë ia kam përsëritur ushtrueses të detyrës të drejtorit që të bëj ekzekutimin e këtij vendimi për muajin mars dhe nuk kam përgjigje zyrtare se do ta ekzekutoi”, tha Abdyli.

I vetëdijshëm se kjo formë e komunikimit në rrjete sociale mund të mos u duket e këndshme atyre që kanë obligim në zbatim të këtij vendimi Abdyli thotë se etika e tij morale e profesionale nuk e lejojnë të hesht dhe nuk do të heshtë në mbrojtjen e të drejtave ligjore të këtyre punonjësve, në kohën kur hesht Këshilli i Bibliotekës, hesht sekretari permanent i MKRS, hesht Ministri i MKRS, hesht sinjalizuesi i BKK-së.

“Në punën time në administratë me një përvojë 36 vite, prej të cilave mbi 20 vite në Bibliotekë nuk më ka ndodhur një absurd i llojit të tillë që një vendim i një organi legjitim e në interes të punëtorëve të mos zbatohet. Krejt në fund qëllimi fundamental i këtij reagimi është realizimi të drejtave në pagë të punëtorëve, çdo interpretim tjetër për t’i dhënë konotacion tjetër është gabim. Në momentin që do të ekzekutohet vendimi DMZP unë e fshij këtë postim”, tha ai. /Kosova.info/