IKMT ka nisur mëngjesin e sotëm aksionin për shembjen e banesave në zonën e “5 majit” në Tiranë, në kuadër të procesit të rindërtimit.

Aksioni është shoqëruar me tension dhe përplasje mes banorëve dhe policisë. Banorët e zonës kanë refuzuar që të largohen nga pronat e tyre duke u dalë përpara fadromave.

Disa prej tyre kanë ndërmarrë veprime më ekstreme, duke u lidhur me pranga në portat e banesës.

Banorët e kanë kundërshtuar shembjen e banesave pasi e konsiderojnë vendimin si të njëanshëm dhe të padakordësuar me bashkinë. Sot ishte afati i fundit për banorët për lirimin e banesave. Ata pretendojnë se nuk janë lajmëruar për prishjen e objekteve.

Në total IKMT-ja ka shembur katër godina në zonën e “5 majit”. Banesa e fundit ku është ndërhyrë ishte ajo në një shtëpi përballë shkollës “Ardian Klosi”.

I fundit që bëri rezistencë përballë uniformave blu ishte një i ri, i cili hipi mbi çati i lidhur me pranga. U desh ndërhyrja e FNSH-së që i riu të shoqërohet dhe të zbresë nga banesa.

Përpos forcave të policisë bashkiake në terren kanë qenë edhe Forcat Speciale si dhe Forcat Shqiponja.