Sonte, në Prishtinë, zhvillohet një ngjarje më të rëndësishme për skenën muzikore shqiptare. Grupi legjendar kosovar “Marigona” ngjitet për herë të fundit në skenë me koncertin madhështor të titulluar “Përjetë”, duke i dhënë fund një rrugëtimi shumëvjeçar të mbushur me këngë, emocione dhe suksese.

Koncerti përmbyllës i grupit “Marigona” do të nisë në orën 19:00, në parkingun e Pallatit të Rinisë në Prishtinë. Ky organizim, me sponsor medial Radio Televizionin e Kosovës, pritet të mbledhë adhurues të shumtë të muzikës që për dekada ka shoqëruar breza të tërë.

Në këtë mbrëmje të veçantë, “Marigona” do të sjellë repertorin e tyre më të njohur në një performancë të drejtpërdrejtë, duke rikthyer këngët që kanë lënë gjurmë në historinë e muzikës rok dhe pop shqiptare.

Një ditë para koncertit përmbyllës, grupi u nderua me mirënjohje nga Albulena Haxhiu dhe nga Përparim Rama, për kontributin e jashtëzakonshëm të dhënë ndër vite në promovimin e muzikës dhe kulturës shqiptare.

Koncerti “Përjetë” shënon jo vetëm një natë të veçantë muzikore, por edhe mbylljen e një kapitulli të rëndësishëm të skenës shqiptare. Pas një karriere disa dekadëshe, “Marigona” lë pas një trashëgimi artistike të çmuar dhe kujtime të shumta për publikun.