Anëtari i LDK-së, Visar Berisha, ka kritikuar idenë e zgjedhjes së Presidentit të Republikës me votë popullore, siç është propozuar nga Vjosa Osmani. Sipas tij, ky propozim cenon frymën e Kushtetutës, prish balancat institucionale dhe dëmton konsensusin politik që konsiderohet themelor për stabilitetin e vendit.

Berisha thekson se zgjedhja e Presidentit nga Kuvendi mbetet forma më e përshtatshme për të ruajtur funksionimin e shëndetshëm të institucioneve dhe për të siguruar një proces politik të balancuar. Ai argumenton se çdo përpjekje për ndryshim të kësaj forme mund të jetë ose e nxituar, ose e motivuar nga interesa të ngushta politike.

Kritikat vijnë në një kohë debati të gjerë politik mbi mënyrën e zgjedhjes së Presidentit dhe rolin që duhet të ketë populli në këtë proces duke hapur diskutime të reja mbi balancat kushtetuese dhe demokracinë përfaqësuese. /Kosova.info/