Reagimeve për mosvazhdimin e kontratës së gazetares Edina Avdiu në Radio Televizioni i Kosovës (RTK) i janë bashkuar edhe zyrtarë të Lidhja Demokratike e Kosovës (LDK), të cilët e kanë cilësuar rastin si ndërhyrje politike në median publike.

Anëtarja e Kryesisë së LDK-së, Sibel Halimi, ka reaguar pas mosvazhdimit të kontratës së gazetares Edina Avdiu në Radio Televizioni i Kosovës (RTK) duke e cilësuar rastin si shembull të presionit politik mbi profesionistët e medias.

Halimi ka deklaruar se “ky vend nuk i nënshtrohet diktatit, sado i fortë të jetë presioni i pushtetit” duke shtuar se gjithmonë do të ketë profesionistë që i shërbejnë profesionit me dinjitet dhe integritet.

Sipas saj, gazetarja Edina Avdiu, e cila është shtatzënë, është larguar nga puna pasi ka refuzuar të lexojë lajme të parapërgatitura duke mbrojtur standardet profesionale dhe pavarësinë editoriale.

“Sepse ka ende njerëz që e mbrojnë fjalën, edhe kur çmimi është i lartë”, ka theksuar Halimi në reagimin e saj duke shprehur mbështetje publike për gazetaren.

Deputetja e Lidhja Demokratike e Kosovës (LDK), Hykmete Bajrami, ka reaguar ashpër ndaj mosvazhdimit të kontratës së gazetares Edina Avdiu në Radio Televizioni i Kosovës (RTK) duke e cilësuar vendimin si “sulm të hapur ndaj lirisë së shtypit dhe pavarësisë së mediave në Kosovë”.

Bajrami ka deklaruar se Avdiu, pas tre vitesh pune në transmetuesin publik, është larguar vetëm pse refuzoi, sipas saj, të bëhej “zëdhënëse e propagandës së pushtetit”.

Ajo ka theksuar se gazetarja ndodhet në muajin e pestë të shtatzënisë dhe është larguar nga puna pasi refuzoi të lexojë tekste të hartuara, siç u shpreh ajo, “në kuzhinën e LVV-së”.

Në reagimin e saj, Bajrami ka kritikuar edhe kryeministrin Albin Kurti duke thënë se “po, Kurti jep shtesa për lehona, por nuk i mirëkupton gratë që nuk pajtohen me të, që i bëjnë pyetje të vështira e kërkojnë argumente në vend të propagandës”.

Sipas saj, ata që e quajnë veten “qeveri e popullit” e duan popullin vetëm për vota dhe duartrokitje, ndërsa kush nuk pajtohet me ta, konsiderohet armik.

“Në një shtet normal, gazetarët si Edina do të mbroheshin, jo të largoheshin nga puna gjatë shtatzënisë për shkak të pyetjeve të drejtpërdrejta dhe sfidimit të propagandës. Nëse ka drejtësi në këtë shtet, Edina do të kthehet në RTK, e RTK-ja do t’i kthehet publikut”, ka përfunduar Bajrami.

Ndërkaq, deputeti Ermal Sadiku ka theksuar se Avdiu, në muajin e pestë të shtatzënisë, është larguar nga RTK-ja sepse refuzoi të lexojë tekste të hartuara në kuzhinën e LVV-së. /Kosova.info/