Në politikën e Klinës po rikthehet një skenar që dikur u mendua se ishte mbyllur përgjithmonë. Sipas burimeve brenda partive, po përflitet për një koalicion të ri ndërmjet AAK-së dhe LDK-së, dy subjekte që dikur patën përplasje të ashpra, ku pasojat i ndjeu më së shumti ish-drejtori i Arsimit, Arben Limanaj.

Të gjithë e kujtojnë momentin kur, në mandatin e kaluar, Zenun Elezaj, në atë kohë kryetar i komunës dhe përfaqësues i AAK-së, e shkarkoi papritur Arben Limanajn nga posti i drejtorit. Shkarkimi, sipas shumë burimeve të asaj kohe, ndodhi pa asnjë paralajmërim, pa ndonjë arsyetim të qartë profesional, por si pasojë e tensioneve politike që kishin lindur në kuadër të koalicionit AAK–LDK.

Ky veprim u pa si një poshtërim publik ndaj njërit prej drejtuesve më të suksesshëm në administratën lokale, i cili për shumë vite kishte drejtuar arsimin në Klinë me rezultate konkrete. Por, pavarësisht punës së tij, Limanaj u përjashtua në mënyrë të ftohtë, duke u bërë shembull i mënyrës sesi interesat e ngushta partiake mund të flakin mënjanë njerëzit e punës.

Ironia e sotme qëndron pikërisht këtu: Pas gjithë asaj që ndodhi, pas gjithë tensioneve e fjalëve të rënda, po flitet që LDK dhe AAK janë sërish në prag të një bashkëpunimi të ri. Madje, në disa qarqe politike po përmendet edhe vetë emri i Arben Limanajt, që po shihet si pjesë e këtyre lëvizjeve të reja.

Nëse kjo ndodh, atëherë historia duket se po përsëritet me të njëjtët aktorë, por në rrethana krejt të ndryshme. Në vend që të mbetet si simbol i dinjitetit politik të nëpërkëmbur, Limanaj, sipas disa vëzhguesve, rrezikon të shfaqet si njeriu që kthehet te ata që dikur e përbuzën.

Në politikë mund të ketë kompromise, por publiku e ka të vështirë ta kuptojë se si dikush mund të shtrijë dorën drejt atyre që e kanë larguar në mënyrë aq brutale dhe pa arsye. Ndërkaq, Zenun Elezaj, që dikur u tregua i ashpër ndaj partnerëve të vet në koalicion, sot gjendet në pozitë krejt tjetër.

Ai shihet si një burokrat tipik lokal, që në vend të konsistencës, ndjek lëvizjet e rrymës për të mbajtur pushtetin me çdo kusht.

Nëse ky bashkëpunim mes AAK-së dhe LDK-së konkretizohet, atëherë do të kemi një nga kthesat më të çuditshme politike në Klinë, ku miqtë e djeshëm janë bërë armiq, e armiqtë e djeshëm po shkojnë drejt përqafimit politik.

Në fund, qytetarët e Klinës me të drejtë pyesin: A është kjo politikë parimesh, apo thjesht politikë interesash? Sepse përderisa njerëzit që janë përjashtuar me përbuzje kthehen në të njëjtat zyra dhe tavolina, duket se nuk ka mbetur shumë vend për idealizëm, vetëm për llogari dhe interesa personale./Kosova.info/