Gazetari Zejdush Kastrati ka reaguar ashpër ndaj disa deklaratave të bëra nga liderët politikë në Kosovë, veçanërisht atyre gjatë dhe pas fushatave zgjedhore duke i cilësuar si të paarsyeshme dhe të papërgjegjshme. Në fokus të reagimit të tij ka qenë edhe kryetari i Prishtinës, Përparim Rama, për të cilin Kastrati thotë se po dështonte në mënyrë të përsëritur në udhëheqjen e kryeqytetit.

Ai e ka quajtur befasuese dhe të papranueshme një deklaratë të Ramës gjatë fushatës, ku mbështetësit e ish-partisë udhëheqëse në komunë – Lëvizjes Vetëvendosje – i kishte quajtur “beretat e kuqe”, ndërsa së fundmi i ka etiketuar si “sekt” duke shtuar: “U çliruam prej okupatorit serb, tash po na okupojnë partiashat, çifti i Kurtit me ekipin e vet…!”

Kastrati i bën thirrje Ramës që të reflektojë për pozicionin që mban si kryetar i kryeqytetit duke e quajtur këtë sjellje të papranueshme për një udhëheqës të një institucioni me kaq peshë.

“Jo Përparim, kështu nuk udhëhiqet kryeqyteti, dhe edhe kjo deklaratë është dështim i yti i radhës,” shkruan ai.

Gazetari kujton se edhe pas tetë vitesh qeverisje të Prishtinës nga Lëvizja Vetëvendosje, e cila kishte në krye një figurë të përfolur si kuadër i “Oksfordit”, qyteti përjetoi rrënim dhe neglizhencë, ndërsa sipas tij, Rama, i ardhur nga Londra, po e ndjek të njëjtin avaz në këto katër vitet e fundit.

Në fund, ai nuk nguron të thumbojë duke thënë se, ndonëse vjen nga një e kaluar komuniste, Isa Mustafa po del të ketë qenë më i mirë dhe më dinjitoz në udhëheqjen e Prishtinës.

“Shumë më i mirë e më i dinjitetshëm si kryetar i Prishtinës po na del ‘komunisti’ Isa Mustafa…!”, përfundon Kastrati. /Kosova.info/