Sindikata e Policisë së Kosovës ka dënuar ashpër atentatin kriminal që i mori jetën Rreshter Muhamed Likës duke e cilësuar këtë akt si një sulm të drejtpërdrejtë ndaj sigurisë publike, ligjit dhe vetë shtetit të Kosovës.

Në reagimin e saj, Sindikata thekson se çdo sulm ndaj një zyrtari policor është një goditje ndaj Republikës së Kosovës dhe se përpjekjet për të minuar themelet e shtetit nuk do të tolerohen.

“Shtylla kryesore e rendit dhe sigurisë në vend është Policia e Kosovës. Prekja e saj është përpjekje për të minuar themelet e shtetit tonë dhe nuk do të tolerohet. Kërkojmë nga institucionet e drejtësisë veprime të menjëhershme për zbardhjen e këtij akti kriminal dhe vënien para përgjegjësisë të autorëve,” thuhet në deklaratën e Sindikatës.

Tutje, Sindikata ka shprehur mbështetjen e palëkundur për çdo pjesëtar të Policisë së Kosovës, duke nënvizuar se aktet e frikësimit nuk do të ndikojnë në përkushtimin e tyre ndaj detyrës dhe Republikës.

“Nder dhe lavdi për sakrificën e Rreshter Muhamed Likës,” përfundon deklarata. /Kosova.info/