Kryeministri i Maqedonisë së Veriut, Hristijan Mickoski, njoftoi se për momentin nuk është planifikuar të shpallet gjendje e jashtëzakonshme në vend dhe se nuk ka plan për të përfshirë ekspertë ndërkombëtarë në hetimin e tragjedisë që ndodhi në Koçan, ku humbën jetën të paktën 59 persona.

Mickoski theksoi se institucionet vendase janë të afta të përballojnë hetimin e këtij incidenti dhe se ky proces mund të përfundojë brenda vendit.

Ai u shpreh se është e domosdoshme që të gjithë të ndihen përgjegjës për këtë tragjedi, përfshirë edhe ata që janë në pushtet, duke shtuar se do të bëjë gjithçka që është e mundur për të luftuar sistemin e korruptuar që ka dëmtuar vendin.

Mickoski: “Do të mundim këtë sistem të korruptuar”

Në përgjigje të pyetjeve nga gazetarët, Mickoski theksoi se nuk ka dilema për përgjegjësinë morale të autoriteteve dhe tha se, si kryeministër, ai është i angazhuar të mund sistemin politik që ka kontribuar në krijimin e kushteve të tilla. 

“Të gjithë duhet të ndiejmë përgjegjësi morale, por së pari do të mund këtë sistem dhe pastaj mund të flasim për gjithçka tjetër”, shtoi ai, raportojnë mediat në Maqedoni të Veriut.

Ndihma ndërkombëtare dhe mobilizimi i institucioneve

Kryeministri maqedonas po ashtu informoi se shtetet fqinje, si Bullgaria, Greqia, Serbia dhe Turqia, kanë ofruar ndihmë për shtrimin e të plagosurve, duke pranuar disa prej tyre në spitalet e tyre. Shtete të tjera, si Kroacia, Austria dhe Holanda, kanë shprehur gatishmërinë për të ofruar ndihmë shtesë për të trajtuar viktimat dhe për të mbështetur përpjekjet e shpëtimit.

Mickoski falënderoi gjithashtu institucionet vendase, përfshirë punonjësit shëndetësorë dhe policinë, për mobilizimin e shpejtë dhe reagimin efikas pas tragjedisë.

Hetimi

Kryeministri maqedonas tha se më shumë se 20 persona janë ndaluar ose janë thirrur për t’u pyetur nga prokurorët në lidhje me incidentin. Ai paralajmëroi se do të zbulohet më shumë informacion alarmant gjatë hetimeve dhe që falsifikimi i licencave është vetëm një nga problemet që lidhen me këtë tragjedi, duke sugjeruar se mund të ketë raste të ngjashme të fshehura në të gjithë vendin.