Gjilani përjetoi një tubim historik politik, ku mbi 8.000 qytetarë dolën për të mbështetur Lidhjen Demokratike të Kosovës (LDK) dhe kandidatin për kryeministër, Lumir Abdixhikun. Ish-kryetari i Gjilanit dhe kandidat për deputet, Lutfi Haziri, shprehu mirënjohjen e tij të thellë për këtë manifestim madhështor.

“Kështu, në mënyrë madhështore, solemne dhe me plot dashuri, siç dinë gjilanasit e mi, e mirëpritëm kryeministrin tonë në ardhje dhe mikun tim, Dr. Lumir Abdixhiku,” tha Haziri, duke e cilësuar këtë si momentin më emocional dhe vlerësues të karrierës së tij elektorale.

Ai theksoi se ky besim nuk e bën atë dhe kolegët e tij më kryelartë, por më të përulur dhe më të përkushtuar për punën e tyre. Haziri i bëri homazh presidentit historik Ibrahim Rugova, duke u zotuar se do të jenë gardianë të projekteve zhvillimore të Gjilanit.

“Do të mbetem gjithmonë, Lut4 juaj!” përfundoi Haziri, mes duartrokitjeve të rugovistëve të mbledhur për këtë manifestim politik. /Kosova.info/