Kandidati për kryeministër nga koalicioni “Për Kosovën fituese”, Ramush Haradinaj, bashkë me partnerë të koalicionit në Prizren zhvilluan tubim me qytetarët. Haradinaj e quajti Prizrenin thesar të Kosovës. Haradinaj tha se në programin e tyre i kanë 10 faqe që i dedikohen familjes.

“Në programin tonë 10 faqe janë për familjen. Ky program është punuar prej një viti e është botuar para 6 muajsh. Nuk është asgjë rastësi angazhimi ynë në mbrojtje të familjes. Këtë nuk e bëjmë për hatër të dikujt as për hatër të votës”, tha ai.

Lideri i AAK-së që është kandidat për kryeministër tha se duhet të përmbyllet çështja e sigurisë duke u anëtarësuar direkt në NATO.

“Nuk ka dikush që mund ta lidhë Kosovën jo vec me Amerikë e NATO. Nëse doni të kryni këtë punë që ka rëndësi, për ekonomi, financa, të thithim fonde, investime e të bëjmë zhvillim, mos harroni është 137”, tha Haradinaj.

Ai foli edhe për investime në energji.

“Do të uli çmimin e energjisë gradualisht, por brenda në dy vite e gjysmë çmimi i faturave ulet për 20 për qind. 450 megavat ndërtohen shpejt me gazsjellës në rrethinë të Ferizajt. Është vendi të lidhet centrali i ri me gaz”, tha ai.

Ndërkaq, partneri i koalicionit, lideri i NIsmës, Fatmir Limaj, ka shprehur bindjen se me 9 shkurt prizrenasit do të rreshtohen rreth numrit, 137.

“Le të bëhemi bashkë me 9 shkurt në listën fituese e përbashkuese. Në numrin 137 ka veç vepra. Pizreni e Kosova të rreshtohet rreth numrit 137 dhe koalicionit fitues”, theksoi Limaj.