Ish-presidenti i Kosovës, Fatmir Sejdiu, ka qëndruar për vizitë në qytetin Bursa të Turqisë, me ftesë të Shoqatës së Afaristëve Shqiptarë të këtij qyteti. Gjatë kësaj vizite, Sejdiu mbajti një fjalim mbresëlënës për personalitetet e biznesit, duke u fokusuar tek procesi historik i Pavarësisë së Kosovës dhe roli i rëndësishëm i shqiptarëve në Turqi në këtë arritje historike.

Në takimin qendror të Bizneseve Shqiptare në Bursa, ku morën pjesë mbi 200 afaristë, Sejdiu veçoi dhe falënderoi kryetarin Gökhan Biçrn dhe sekretarin e përgjithshëm Refik Beri për kontributin e tyre. Në këtë ngjarjeje, u arrit një marrëveshje për bashkëpunim ndërmjet Rrjetit të Bizneseve Shqiptare në Gjermani, të kryesuar nga Nazmi Viqa, dhe Rrjetit të Bizneseve Shqiptare në Zvicër, përfaqësuar nga Sejdi Jusufi, me Shoqatën e Afaristëve Shqiptarë të Bursës. Marrëveshja synon zgjerimin e organizimeve dhe rritjen e bashkëpunimit ndërmjet bizneseve shqiptare në mbarë botën.

Gjatë vizitës, Sejdiu vizitoi edhe fshatin Kursunlu, ku u takua me të afërm dhe qytetarë me prejardhje nga Kosova, të cilët ishin shpërngulur me dhunë nga regjimi serb në vitet 1920. Ai u prit me mikpritje të veçantë dhe falënderime nga komuniteti lokal, të cilët ruajnë kujtime dhe lidhje të forta me vendlindjen e tyre.

Kjo vizitë jo vetëm që promovoi vlerat historike të Pavarësisë së Kosovës, por gjithashtu forcoi lidhjet mes shqiptarëve në diasporë dhe ndërtoi ura të reja bashkëpunimi ndërmjet bizneseve shqiptare. /Kosova.info/