Kryetari i PSD-së, Dardan Molliqaj, ka bërë një deklaratë të ashpër në adresë të kryeministrit Albin Kurti dhe kabinetit të tij qeveritar. Duke ironizuar deklaratat e fundit të Kurtit mbi çështjet e transparencës, Molliqaj tha se është e pabesueshme që disa prej ministrave nuk kujtojnë çmimet e banesave të tyre luksoze, veçanërisht në zona si “Marigona Hill”.

“Meqë Kurti nuk po beson që dikujt nuk mund t’i kujtohet se si ka bërë para, po ia rikujtojmë se ka edhe më keq: kur ministrave të tij nuk ju kujtohet sa kanë blerë banesat në lagjet më luksoze të Kosovës. Në fakt, as unë nuk besoj që mund të blesh banesë në ‘Marigona Hill’ e të mos ta kujtosh çmimin,” u shpreh Molliqaj në një konferencë për media.

Ai kritikoi mungesën e llogaridhënies dhe e konsideroi këtë si një tregues të shkëputjes së qeverisë nga realiteti i përditshëm i qytetarëve të Kosovës. Sipas Molliqajt, këto raste janë vetëm një pjesë e vogël e problemeve më të thella të sistemit të qeverisjes aktuale.

Deklarata e tij ka ngjallur reagime në opinionin publik duke nxitur diskutime rreth etikës dhe transparencës së zyrtarëve qeveritarë në menaxhimin e financave personale dhe publike. PSD ka paralajmëruar se do të vazhdojë të mbajë qeverinë përgjegjëse për mungesën e transparencës në vendimmarrje dhe jetën e saj publike. /Kosova.info/