Uragani Milton arriti në bregun e Floridës natën e së mërkurës si një stuhi e kategorisë 3, sipas Qendrës Kombëtare të Uraganeve të SHBA-së, duke shkaktuar përmbytje të rrezikshme dhe stuhi të fuqishme që kërcënojnë jetën. Mbi një milion njerëz kanë mbetur pa energji elektrike dhe është raportuar për viktima të shumta.

Stuhia e fuqishme zbarkoi në Florida rreth orës 20:30 me kohën lokale, pranë Siesta Key, në jug të Tampas, me erëra që arrinin shpejtësi maksimale prej rreth 200 kilometra në orë

Momenti i arritjes së uraganit në tokë u kap nga Instituti Kooperativ për Kërkime Atmosferike, i cili publikoi video satelitore të stuhisë së madhe teksa lëvizte përmes shtetit. Videot përfshinin momentin kur uragani zbarkoi pranë Siesta Key, vetëm pesë milje në jug të qytetit të Sarasotës.