Në prag të zgjedhjeve të ardhshme, debati politik në Kosovë po intensifikohet, me fokus të veçantë në strategjitë e partive kryesore dhe rolin e diasporës në procesin zgjedhor. Aderimi i figurave të reja dhe mobilizimi i elektoratit të pasivizuar po shihen si faktorë kyç për suksesin e subjekteve politike. Ndërkohë, analistët ngrenë çështjen e rëndësisë së vizioneve dhe programeve konkrete, duke argumentuar se partitë tashmë kanë bërë transformime gjeneracionale dhe duhet të përqendrohen në zgjidhjen e sfidave socio-ekonomike të vendit.

Sylë Ahmeti, gazetar dhe njohës i thellë i politikës, ka vlerësuar aderimin e figurave të reja në LDK dhe në PDK, veçanërisht atyre me prejardhje nga familje ish-veprimtarësh dhe luftëtarësh të lirisë, si familja Çekaj.

Ahmeti e cilëson këtë si një infuzion të fuqishëm për LDK-në në zgjedhjet e vitit 2025.

Sipas tij, orientimi i LDK-së drejt mobilizimit të diasporës është një hap strategjik.

“LDK-ja ka filluar të aktivizojë strukturat e saj jashtë vendit, siç tregohet edhe me angazhimin e Florim Zeqës në Itali,” tha Ahmeti për Kosova.info.

Në anën tjetër, analisti Shenoll Muharremi e sheh situatën ndryshe.

Ai thekson se për zgjedhjet e 9 shkurtit, partitë kryesore si LVV, PDK dhe LDK nuk duhet të fokusohen në aderime të reja, pasi tashmë kanë kuadro të mjaftueshme brenda.

“Në vend që të humbin kohë me transfere, partitë duhet të na tregojnë programet dhe vizionet e tyre për të zgjidhur sfidat socio-ekonomike të Kosovës,” tha Muharremi. /Kosova.info/