Marshallët amerikanë ende po i kërkojnë tre kriminelët që kishin ikur prej burgut të Alkatrazit në vitin 1962

Në vitin 1962, tre kriminelë arritën të arratiseshin nga burgu më i rreptë në botë – Alkatraz.

Që atëherë, askush nuk ka dëgjuar më asnjë fjalë për ta gjersa dy teori janë zhvilluar në publik për epilogun e arratisjes së tyre – njëra se ata vdiqën duke u përpjekur të kalonin gjirin e San Franciscos dhe të tjerë që ia dolën të iknin me sukses.

Kjo është arsyeja pse policia amerikane sërish ka publikuar fotografi se si mund të duken tani. Rreth 60 vjet më parë, Frank Morris, John Anglin dhe vëllai i tij, Clarence arritën të arratiseshin përmes tunelit nga burgu famëkeq i Gjirit të San Franciscos. Pas kësaj ata “hipën” në një gomone dhe u larguan.

Për të fshehur identitetin, të tre burrat krijuan koka false prej allçie, kishin ngjyrë mishi dhe flokë të vërtetë njeriu. Deri në arratisje, ato i fshehën me sukses në qelitë e tyre, shkruan skynews.

Ndërkohë, tunelin e burgut e hapën me enë të kuzhinës dhe gjësende të tjera. Ata përfunduan në çatinë e ndërtesës dhe më pas hipën në një varkë.

Disa orë më vonë, zyrtarët vunë re se ata ishin të zhdukur dhe filluan një kërkim intensiv. Që të tre ishin dënuar për grabitje bankare, vjedhje dhe krime të ndryshme.

Rasti, i cili frymëzoi filmin, “Escape from Alcatraz“, i realizuar në vitin 1979, bëri shumë të pyesin se çfarë ndodhi me Maurice dhe vëllezërit Anglin.

Disa besojnë se të tre u mbytën gjatë arratisjes, ndërsa disa prova sugjerojnë se ata arritën në breg me varkën e tyre.

Ata që besojnë se nuk janë gjallë e shpjegojnë këtë me faktin se dy ditë pas arratisjes u gjet një paketë letrash që i përkiste njërit prej të arratisurve, të mbyllur me gomë.

Një jelek shpëtimi i bërë vetë u gjet gjithashtu në një plazh aty pranë, por nuk u gjetën sende të tjera.

Në vitin 2011, Mike Dyke nga Marshallët e SHBA-së tha se kishte siguruar prova se varka ishte gjetur pranë Alkatrazit në ishullin Angel dhe se një veturë ishte vjedhur aty pranë pas arratisjes së tyre.

FBI zyrtarisht e mbylli çështjen më 31 dhjetor të vitit 1979. Gjatë 17 viteve që FBI-ja punoi për këtë çështje, nuk u shfaq asnjë provë që të tregonte se burrat ishin ende gjallë.

Megjithatë, Shërbimi i Marshallit të SHBA-së është ende në kërkim të tyre.

“Pavarësisht kohës, ne do të vazhdojmë t’i kërkojmë dhe t’i nxjerrim para drejtësisë”, tha një nga marshallët.

Ndryshe, ky burg, i cili ndodhej në një ishull të shkretë, ku po vuanin dënimet kriminelë si Al Capone dhe Robert Straud, u mbyll në vitin 1963 pasi funksionoi për më shumë se tre dekada.

Vetë emri Alkatraz erdhi nga emri i zogjve të detit, banorë të ishullit.

Gjithashtu konsiderohej se Alkatraz ishte i përhumbur, sepse në vend të tij më parë kishte një varrezë indiane.

Pas daljes nga burgu, shumë të burgosur raportohet se çmendeshin dhe disa prej tyre pohuan se kishin parë gjëra të çuditshme gjatë qëndrimit në Alkatraz. Rreth 42 qeli në këtë burg u shënuan si të përhumbura.

Go to TOP