Presidenti i Ukrainës, Volodymyr Zelensky, ka përsëritur kërkesën që vendi i tij të anëtarësohet në NATO, duke theksuar se Ukraina tashmë e ka dëshmuar veten si partnere e besueshme dhe se anëtarësimi i saj në aleancë do të ishte “plotësisht i natyrshëm”.

Duke folur në Forumin e Industrisë së Mbrojtjes në kuadër të Samitit të NATO-s në Ankara, Zelensky deklaroi se Ukraina nuk është më vetëm përfituese e sigurisë, por edhe ofruese e saj.

Sipas tij, ushtria ukrainase është bërë një “burim i kapaciteteve të jashtëzakonshme mbrojtëse” për Evropën, falë përshtatjes së shpejtë teknologjike.

“A besoni vërtet se do të ishte e drejtë të lihej jashtë NATO-s një vend dhe një popull me këtë nivel kapacitetesh mbrojtëse?”, tha ai. “Nëse tashmë i kemi këto kapacitete dhe ukrainasit tashmë dinë të luftojnë në këtë mënyrë, atëherë ka kuptim që ato të bëhen pjesë e mbrojtjes kolektive të Aleancës. Kjo do të na bënte të gjithëve më të fortë.”

Zelensky tha gjithashtu se anëtarësimi i Ukrainës do ta forconte fuqinë parandaluese të NATO-s ndaj Rusisë.

Presidenti amerikan Donald Trump ka përjashtuar mundësinë e anëtarësimit të Ukrainës në aleancë dhe, për një periudhë, dukej se edhe Kievi e kishte lënë mënjanë këtë ide. Megjithatë, lufta SHBA-Izrael kundër Iranit ka ndryshuar profilin e Ukrainës, duke e vendosur atë në qendër të inovacionit ushtarak.

Zelensky theksoi se forcat ukrainase kanë kapacitete goditëse me rreze të mesme dhe të gjatë.

“Ne e kemi eliminuar plotësisht vetë idenë që Rusia të ketë një prapavijë strategjike”, tha ai, duke shtuar se “Rusia besonte se kishte një avantazh territorial” për ta mbajtur të paprekur prodhimin e saj ushtarak.

“Dronët ukrainas depërtuan në mbrojtjen ruse dhe goditën një rafineri ruse të naftës në Siberi”, tha ai.

Të hënën, forcat ukrainase kryen një sulm me dron ndaj një rafinerie nafte në qytetin Omsk, duke goditur objektin më të rëndësishëm të prodhimit të karburantit në Rusi, më shumë se 2.500 kilometra nga kufiri Rusi-Ukrainë.

“Kjo nuk është përjashtim. Është realiteti i ri dhe nuk ka mbetur asnjë rafineri e madhe nafte në Rusi që të mos jetë goditur nga Ukraina”, u shpreh Zelensky.

Ai shtoi se Ukraina dhe Evropa kanë mungesa në mbrojtjen ajrore kundër raketave balistike dhe se nivelet aktuale të prodhimit në Perëndim nuk janë të mjaftueshme për shkallën e sulmeve që po shihen në Ukrainë dhe në Lindjen e Mesme.

“Ata që mbrojnë jetën kanë nevojë për më shumë Patriot”, tha ai, duke iu referuar sistemit amerikan të mbrojtjes ajrore, ndërsa u bëri thirrje vendeve evropiane të zhvillojnë pa vonesë alternativa që mund të prodhohen në masë.

Zelensky pritet të kërkojë sërish që licenca për raketat interceptuese Patriot të ndahet me Ukrainën, kur të takohet me Trumpin në Ankara të mërkurën. / Euro News