Presidenti i SHBA-së, Donald Trump, u tha gazetarëve gjatë takimit dypalësh me presidentin turk, Recep Tayyip Erdoğan, se Shtetet e Bashkuara do t’i heqin sanksionet ndaj Turqisë.

“Nuk duam të vendosim sanksione ndaj miqve. Është shumë e thjeshtë. Ka plot njerëz që mund t’i sanksionojmë, dhe po e bëjmë këtë. Nuk duam t’i sanksionojmë miqtë”, tha Trump.

SHBA-ja kishte vendosur më herët sanksione ndaj Turqisë pasi vendi kishte blerë një sistem rus të mbrojtjes ajrore. Sanksionet kishin në shënjestër agjencinë kryesore turke të prokurimit të mbrojtjes.

Trump tha gjithashtu se po shqyrton mundësinë që SHBA-ja t’i shesë Turqisë avionë luftarakë F-35. Më parë, ai e kishte përjashtuar Turqinë nga programi F-35 pasi Ankaraja bleu sistemin rus të mbrojtjes ajrore.

Trump përsërit se SHBA-ja duhet ta kontrollojë Grenlandën

Në deklaratat para gazetarëve, Trump përsëriti qëndrimin e tij se Shtetet e Bashkuara duhet ta marrin nën kontroll Grenlandën.

“Ajo duhet të kontrollohet nga Shtetet e Bashkuara, jo nga Danimarka”, tha Trump, duke shprehur pakënaqësi për kundërshtimin e Evropës ndaj kësaj ideje.

“Kur ata nuk pranuan dhe me gjithë paratë që shpenzojmë për t’i ndihmuar kundër Rusisë, ne nuk kemi pse të shpenzojmë më. Mund t’i tërheqim të gjithë ushtarët tanë nga Evropa, sepse, siç e keni vënë re, Evropa është një vend shumë ndryshe nga sa ishte 20 vjet më parë”, tha ai.

Trump e ka përmendur vazhdimisht idenë që SHBA-ja të marrë Grenlandën, një territor autonom që i përket Danimarkës, e cila vazhdimisht i ka hedhur poshtë deklaratat e tij.

Shtetet e Bashkuara kanë shqyrtuar të paktën dy herë mundësinë e blerjes së Grenlandës, në vitin 1867 dhe më pas në vitin 1946, kur presidenti Harry S. Truman propozoi ta blinte për 100 milionë dollarë. Danimarka e refuzoi ofertën. / NBC NEWS