Lëvizja Vetëvendosje ka publikuar pamje nga punimet në rrugën Bare-Selac, duke theksuar përparimet në ndërtimet publike në veri të vendit. Sipas VV-së, në të kaluarën aty lejohej vetëm ndërtimi i vilave të Radojçiqit, ndërsa tani po ndërtohen shtëpi për qytetarët dhe rrugë të reja.

“Në veri të vendit, dikur lejohej ndërtimi vetëm i vilave të Radojçiqit; sot, aty po ndërtohen shtëpitë e qytetarëve, rrugët e qyteteve dhe të fshatrave. Veriu është i Republikës dhe qytetarëve të saj, jo një ‘dhuratë e Rankoviqit’,” thuhet në deklaratën e VV-së.

Përgjatë katër viteve të fundit të qeverisjes, VV thekson se është bërë një punë e jashtëzakonshme në atë zonë, sidomos në aspektin infrastrukturor, me ndërtimin e shumë rrugëve dhe shtëpive. Rruga Bare-Selac, me gjatësi 8.4 km, është afër përfundimit dhe pritet të ketë rëndësi të veçantë për banorët dhe për sigurinë e vendit.

VV vë në dukje se veriu ka qenë i lënë pas dore jo vetëm për shtrirjen e rendit dhe ligjit, por edhe nga aspekti i infrastrukturës dhe shërbimeve jetësore. “Heqja dorë nga qeveritë e kaluara ka bërë që, përveç presioneve për largim nga ato zona, qytetarët të përballen me mungesë perspektive për një jetë normale, për shkak të mungesës së shërbimeve elementare.”