Skënder, Llej Lika dhe një person i tretë me inicialet K. Gj., janë vënë në pranga nga policia për vrasjen e Rakip (Pilot) Rrokaj.

Policia e Kurbinit ka bërë të ditur se në momentin që janë pikasur, ata kanë tentuar që të largohen.

Gjithashtu është gjetur edhe arma e krimit, tip ‘Kallashnikov’.

Njoftimi i Policisë së Kurbinit:

Kapen dhe vihen në pranga autori i  dyshuar i vrasjes se shtetasit R(P).R dhe 2 bashkëpunëtorët e tij.

Gjithashtu, procedohet penalisht në gjendje të lirë për shkak të moshës shtetasi D.G., banues në Kurbin, për veprën penale ‘Përkrahja e autorit të krimit ‘.

Shërbimet e Policisë kanë gjetur dhe sekuestruar dhe armën e zjarrit kallashnikov, me të cilën dyshohet të jetë kryer krimi.

Në lidhje me ngjarjen e ndodhur me datë 10.12.2021, në Sanxhak, Kurbin, ku mbeti i vrarë me armë zjarri shtetasi R(P).R., 55 vjeç,  Policia ngriti një grup të posaçëm hetimor nën drejtimin e Prokurorisë së Rrethit Gjyqësor Kurbin për zbardhjen e kësaj ngjarjeje.

Nga tërësia e veprimeve hetimore të kryera nga grupi i posaçëm hetimor, rezultoi se ngjarja ka ndodhur për motive të dobëta dhe se autori i  dyshuar i vrasjes së 55- vjeçarit është shtetasi Ll. L., 22 vjeç dhe bashkëpunëtorët babai i tij shtetasi S. L., 56 vjeç dhe shoku i tij shtetasi K.Gj., banues në Kurbin.

Policia e Kurbinit dhe të gjitha strukturat e DVP Lezhë, në bashkëpunim me FNSh Shkodër,Forcën  Operacionale në DPPSh,  dhe forcat speciale Renea, kanë vijuar kërkimet intensive për lokalizimin dhe kapjen e autorëve të dyshuar të vrasjes së 55-vjeçarit.

Si rezultat i kontrolleve të pandërprera të ushtruara në banesa dhe ambjente të ndryshme, ku dyshohej se mund të fshiheshin autorët, mbi bazën e informacioneve të siguruara në rrugë operative dhe në bashkëpunim të ngushtë me qytetarët, Policia bëri të mundur lokalizimin, kapjen dhe vënien në pranga të autorëve të dyshuar, në Fushë Milot, Kurbin.Sapo kanë konstatuar shërbimet e Policisë kanë tentuar të largohen.

Gjithashtu, shërbimet e Policisë gjetën dhe sekuestruan në cilësinë e provës materiale dhe një armë kallashnikov, me të cilën dyshohet të jetë kryer krimi, si dhe u sekuestrua një mjet tip ‘Benz ‘ dhe një motoçikletë, me të cilët dyshohet se lëviznin autorët.

Materialet iu referuan Prokurorisë pranë Gjykatës së Shkallës së Pare Kurbin për veprime të mëtejshme hetimore, për veprat penale ‘Vrasje me paramendim, e kryer në bashkëpunim ‘ dhe ‘Mbajtja pa leje e armëve dhe municioneve luftarake’.