Ministri i Jashtëm turk Hakan Fidan do të presë takimin e parë të Platformës së Paqes në Ballkan të shtunën në Stamboll.

Në takim pritet të marrin pjesë ministrat e jashtëm të Bosnjës dhe Hercegovinës, Malit të Zi, Kosovës, Maqedonisë së Veriut dhe Serbisë, ndërsa Shqipëria do të përfaqësohet nga zëvendësministri i saj i jashtëm, sipas Ministrisë së Jashtme Turke, raporton Anadollu.

Platforma synon të rrisë dialogun, besimin e ndërsjellë dhe bashkëpunimin midis vendeve të rajonit, si dhe të prodhojë zgjidhje të qëndrueshme për çështjet rajonale.

Diskutimet do të përqendrohen në forcimin e integrimit rajonal, ruajtjen e stabilitetit dhe adresimin e rreziqeve aktuale të sigurisë. Projekte konkrete bashkëpunimi, veçanërisht në korridoret e ndërlidhjes, energjisë, komunikimit dhe transportit, do të jenë gjithashtu në agjendë.

Platforma e Paqes në Ballkan shquhet si një iniciativë e zhvilluar brenda kornizës së diplomacisë inovative të Turqisë, që synon të përmbushë nevojat e rajonit.

Turqia i kushton rëndësi të madhe udhëheqjes dhe pjesëmarrjes aktive në platformat dhe nismat shumëpalëshe në Ballkan. Në këtë kuadër, Turqia ka krijuar mekanizmat trepalësh të konsultimit Turqi-Bosnjë dhe Hercegovinë-Serbi dhe Turqi-Bosnjë dhe Hercegovinë-Kroaci.

Ankaraja angazhohet rregullisht në struktura të tilla si Procesi i Bashkëpunimit të Evropës Juglindore, Këshilli i Bashkëpunimit Rajonal dhe Bordi Drejtues i Këshillit të Zbatimit të Paqes në Bosnjë dhe Hercegovinë.

Turqia gjithashtu kontribuon në stabilitetin rajonal përmes pjesëmarrjes së saj në misionin KFOR në Kosovë dhe Althea të Forcave të Bashkimit Evropian në Bosnje dhe Hercegovinë.