Ambasadori amerikan në BE, Andrew Pudzer, ka thënë se aleatët e NATO-s kanë bërë “gabim të madh” duke mos e ndihmuar SHBA-në në luftën në Iran.

Në një intervistë për Euronews, ai deklaroi se evropianët kishin detyrim të ndihmonin, duke marrë parasysh historinë e SHBA-së në mbrojtjen e Evropës.

Sipas tij, presidenti amerikan Donald Trump mbetet i zhgënjyer me vendet e NATO-s që nuk i dolën në ndihmë SHBA-së gjatë ndërhyrjes në Iran.

“E di që ai është shumë i zhgënjyer”, tha Pudzer, duke shtuar se nuk e di nëse ky zhgënjim është ulur.

Zemërimi i SHBA-së lidhet me refuzimin e disa vendeve evropiane, përfshirë Spanjën dhe Italinë, për të lejuar përdorimin e bazave ushtarake dhe hapësirës ajrore për avionët amerikanë që shkonin drejt Iranit.

Ndërkohë, Mbretëria e Bashkuar fillimisht refuzoi përdorimin e bazave në Qipro, por më vonë e lejoi për qëllime të kufizuara mbrojtëse.

Gjermania nuk kufizoi qasjen në bazat amerikane, por kritikoi objektivat e luftës.

Pudzer tha se SHBA pret që aleatët evropianë të lejojnë qasje bazike, duke theksuar se SHBA ka mbrojtur Evropën për dekada.

“Kur nuk na lejohet as të fluturojmë mbi vendet e tyre apo të përdorim bazat e tyre, SHBA dhe presidenti Trump janë shumë të zhgënjyer”, tha ai.

Ai shtoi se kjo situatë ka bërë SHBA-në të vërë në dyshim besueshmërinë e aleatëve evropianë.