Tajlanda ka akuzuar Kamboxhian për shkelje “të qëllimshme” të një armëpushimi që të dy vendet ranë dakord të hënën për t`i dhënë fund përleshjeve kufitare ku për pasojë janë vrarë të paktën 33 persona dhe janë zhvendosur mijëra të tjerë.

Është një fillim i pasigurt për armëpushimin, i cili synon t’i japë fund pesë ditëve të bombardimeve dhe sulmeve me raketa përgjatë kufirit të tyre të përbashkët.

Ushtria tajlandeze thotë se ndaloi së shtëni pas mesnatës, por se vazhdoi të merrte të shtëna nga pala kamboxhiane “në vende të shumta” deri këtë mëngjes.

Por ministria e mbrojtjes e Kamboxhias i tha agjencisë së lajmeve AFP se nuk kishte pasur “përleshje të armatosura” midis dy palëve që kur armëpushimi filloi në mesnatë.

Pavarësisht akuzave, takimet midis komandantëve lokalë nga të dyja palët u zhvilluan më herët të martën si pjesë e marrëveshjes së armëpushimit. Ata ranë dakord të ndalonin të shtënat dhe të ndalonin lëvizjen e trupave në vijën e frontit. Ata gjithashtu do t’i lejojnë njëri-tjetrit të mbledhin të vdekurit e tyre.

Tensionet midis vendeve të Azisë Juglindore mbi kufirin e tyre shekullor të kontestuar u përshkallëzuan në maj, kur një ushtar kamboxhian u vra në një përleshje. Ato u përshkallëzuan në një konflikt të plotë javën e kaluar pasi pesë ushtarë tajlandezë u plagosën në një shpërthim mine tokësore. Tajlanda mbylli disa nga pikat e saj kufitare, dëboi ambasadorin kamboxhian dhe tërhoqi të vetin nga Phnom Penh.

Pasi të dyja palët shkëmbyen zjarr në orët e para të së enjtes së kaluar, Kamboxhia qëlloi disa raketa në Tajlandë, duke vrarë disa civilë.

Civilë të tjerë vdiqën nga të dyja palët në ditët në vijim dhe dhjetëra mijëra të tjerë u evakuuan në strehimore.

Shkëmbimet intensive të zjarrit midis dy ushtrive vazhduan deri në mesnatë të së hënës, afati i fundit për armëpushimin, me Tajlandën që nisi më shumë sulme ajrore ndaj pozicioneve kamboxhiane.

Tajlanda, e cila fillimisht kishte hezituar të negocionte, pranoi bisedimet pasi Presidenti i SHBA-së Donald Trump kërcënoi të ndalonte negociatat mbi tarifat derisa Tajlanda dhe Kamboxhia të ndalonin luftimet.