Sekretari i Përgjithshëm i Kombeve të Bashkuara, Antonio Guterres ka qëndruar në Moskë, ku ka takuar presidentin rus, Vladimir Putin si dhe ministrin e Jashtëm, Sergey Lavrov.

Putin ka rënë dakord “në parim” për përfshirjen e Kombeve të Bashkuara dhe Komitetit Ndërkombëtar për Kryqin e Kuq në evakuimin e qytetarëve nga uzina Azovstal në Mariupol.

Guterres i tha presidentit rus se “pushtimi i Ukrainës bie në kundërshtim me kushtetutën e kartës së OKB-së”.

Ai tha se ishte thellësisht i shqetësuar për situatën humanitare në shtetin ukrainas.

Guterres tha se dëshiron të krijojë një grup të ri të përbërë nga Ukraina, Rusia dhe OKB-ja “për të bashkërenduar ngritjen e korridoreve humanitare”.

Theksojmë se sot kanë dështuar të krijohen korridoret humanitare në Mariupol, megjithëse ushtarët rusë kishin bërë thirrje që qytetarët janë të lirë të largohen.

Ndërkohë, Putin ka deklaruar se situata në qytetin port është e ndërlikuar dhe mjaft tragjike gjersa ka fajësuar pa e justifikuar Ukrainën.

Ndryshe, Guterres pritet të udhëtojë edhe drejt Kievit, ku do të takohet me zyrtarët ukrainas.