Një dron u drejtua drejt rezidencës së kryeministrit izraelit Benjamin Netanyahu në qytetin bregdetar të Caesareas të shtunën, konfirmoi zëdhënësi i tij. Kryeministri nuk ndodhej në zonë dhe nuk pati të lënduar.

Ushtria izraelite njoftoi më herët se droni ishte nisur nga Libani dhe kishte goditur një ndërtesë, pa specifikuar menjëherë natyrën e saj. Dy dronë të tjerë që depërtuan në hapësirën ajrore izraelite u neutralizuan, sipas të njëjtave burime.

Shërbimet e emergjencës izraelite dhe policia konfirmuan mungesën e viktimave, ndërsa shpërthime u dëgjuan në Caesarea, ku Netanyahu zotëron një shtëpi pushimi. Ende asnjë grup nuk ka marrë përgjegjësinë për sulmin, përfshirë Hezbollahun, grupin libanez i mbështetur nga Irani, i cili ka qenë në konflikt me Izraelin që nga tetori.