Mbrojtësi i krahut të Alanyasporit dhe përfaqësueses së Kosovës, Florent Hadërgjonaj, ka bërë të ditur se nuk planifikon të ndalet pas sezonit më të mirë në karrierën e tij.

31-vjeçari zhvilloi një edicion mbresëlënës me skuadrën turke, duke realizuar nëntë gola dhe 11 asistime në 35 paraqitje në kampionat dhe Kupën e Turqisë, ndërsa Alanyaspori e mbylli sezonin në vendin e 11-të.

Në një prononcim për TRT, Hadërgjonaj tha se paraqitjet e sezonit të kaluar janë vetëm një pikënisje për objektivat e tij të ardhshëm.

“E pata sezonin më të mirë të karrierës. Tani synoj të përmirësohem edhe më shumë dhe të arrijmë suksese të tjera”, u shpreh Hadërgjonaj.

Futbollisti kosovar ka një karrierë të pasur në futbollin evropian, ku ka veshur fanellat e Young Boysit, Ingolstadtit, Huddersfield Townit dhe Kasimpashës, ndërsa synon që formën e lartë ta vazhdojë edhe në sezonin e ri me Alanyasporin.