Shumica e vendeve në agjencinë detare të Kombeve të Bashkuara kanë vendosur të shtyjnë me një vit vendimin për vendosjen e një çmimi global të karbonit në transportin detar ndërkombëtar, pas presionit të SHBA-së dhe Arabisë Saudite. Ky vonim përbën një goditje për Bashkimin Evropian dhe vende të tjera që po kërkojnë që industria të bëhet më e gjelbër dhe të vendoset një mekanizëm çmimi për dekarbonizim.

Sipas Reuters, Arabia Saudite paraqiti një mocion për të shtyrë diskutimet për një vit, i cili u miratua nga shumica prej 57 vendeve, ndërsa 49 votuan kundër. Vende si Kina, Greqia, Qiproja, Japonia dhe Koreja e Jugut kishin mbështetur vendosjen e një çmimi për karbonin në prill, por të premten Kina votoi pro shtyrjes, ndërsa të tjerat abstenuan.

Presidenti amerikan Donald Trump bëri thirrje që vendet anëtare të IMO-së të votonin kundër, duke thënë në platformën e tij Truth Social se Uashingtoni “nuk do të pranojë këtë taksë të re të mashtrimit të gjelbër global për transportin detar dhe nuk do t’i nënshtrohet asaj në asnjë formë.”

Industria e transportit detar reagoi e zhgënjyer, duke thënë se shtyrja e vendimit “e lë sektorin të lundrojë në pasiguri,” sipas Faig Abbasov, drejtor i transportit detar në organizatën mjedisore Transport & Environment.

IMO, me 176 vende anëtare, është përgjegjëse për sigurinë dhe mbrojtjen e transportit ndërkombëtar dhe parandalimin e ndotjes. Transporti detar global kontribuon pothuajse 3% të emetimeve të CO₂, dhe rreth 90% e tregtisë botërore realizohet me anije, duke bërë që emetimet të rriten ndjeshëm në mungesë të një mekanizmi të dakorduar.