Dhjetë muaj pasi theu këmbën në një aksident me ski, kapiteni i Bayern Munichut, Manuel Neuer, ka nisur paraqitjen në disa prej stërvitjeve të skuadrës.

Të enjten, 37-vjeçari stërviti bashkë me portierët e tjerë të skuadrës bavareze, Sven Ulreich dhe Daniel Peretz, si dhe me disa lojtarë të skuadrës.

Ishte stërvitja e tij e parë me skuadrën që nga dimri i kaluar, pak ditë pasi Gjermania u eliminua nga faza grupore e Kupës së Botës në Katar.

Dy herë fituesi i Ligës së Kampionëve me Bayernin u operua dhe nuk ishte pjesë e skuadrës për edicionin 2022/23.

“Është ndjenjë e mirë të kthehem në fushë me bashkëlojtarët. Isha shumë i kënaqur”, ka thënë Neuer pas stërvitjes.