“Ata që janë në takim do ta thonë fjalën e tyre – shefi i kabinetit, Luan Dalipi dhe nga Presidenca, shefi i kabinetit të presidencës, Blerim Vela”.
Kështu ka thënë kryeministri i Kosovës, Albin Kurti, teksa pyetet nga gazetarët për organizimin e Ambasadës së Shteteve të Bashkuara të Amerikës për çështjen e Asociacionit.
Kryeministri i Kosovës, Albin Kurti, kishte deklaruar se e respekton konfidencialitetin e bisedimeve, ndërsa për Asociacionin ka shtuar se ka insistim të ndryshëm ndërkombëtar për zbatimin e marrëveshjes. Sipas tij, marrëveshja për Asociacionin, sipas draftit fillestar, nuk e ka kaluar testin e Gjykatës Kushtetuese të Kosovës.
Lidhur me këtë takim, vetë Kurti kishte deklaruar se nuk është ftuar.
Ndërsa, presidentja e Kosovës, Vjosa Osmani, në fjalën e saj ka theksuar se që “gjithçka që ka të bëjë me Amerikën është e mirë”.
Zyrtarë qeveritarë, pjesëtarë të shoqërisë civile, liderë të partive politike dhe diplomatë, po marrin pjesë në diskutimin e organizuar nga Ambasada amerikane në Prishtinë, lidhur me Asociacionin e komunave me shumicë serbe. Ambasada pret të dëgjojë “opinione të menduara mirë”.
Ambasada e SHBA-ve në Kosovë, përmes një postimi në Twitter, ka njoftuar se gjithçka është gati që të nisë takimi ku do të diskutohet për themelimin e Asociacionit të Komunave me Shumicë Serbe.
“Sot në mëngjes, Ambasada e SHBA-së në Prishtinë do të mbajë një takim për Asociacionin e Komunave me shumicë Serbe në Kosovë. Ne mezi presim të dëgjojmë perspektiva të menduara nga një grup i ndryshëm liderësh të shoqërisë civile, zyrtarë qeveritarë dhe liderë politikë”, thuhet në njoftimin e Ambasadës.
Këshilltari i Departamentit amerikan të Shtetit, Derek Chollet dhe i dërguari i posaçëm i SHBA-së për Ballkanin Perëndimor, Gabriel Escobar, kanë ritheksuar edhe një herë domosdoshmërinë për themelimin e Asociacionit të komunave me shumicë serbe.
