Po vazhdojnë punimet e Konferencës ndërkombëtare të ICPA-së, e cila po mbahet në Singapor. Në këtë konferencë po marrin pjesë drejtorë ekzekutivë, profesionistë dhe ekspertë të shërbimeve korrektuese nga e gjithë bota.

Pjesë e kësaj konference është edhe drejtori i përgjithshëm i Shërbimit Korrektues të Kosovës, Ismail Dibrani, i cili zhvilloi takime të rëndësishme me Peter Severin, president i ICPA-së, Natalie Boal, drejtoreshë ekzekutive, si dhe homologë e përfaqësues nga shumë shtete të ndryshme të botës si: SHBA, Turqia, Singapori, Franca, Belgjika, Filipinet, Maldivet, Indonezia, etj.

Gjatë këtyre takimeve u diskutuan temat kryesore që lidhen me të ardhmen e shërbimeve korrektuese në nivel global.

Në këtë konferencë, këshilltari global i ICITAP-it për kundërterrorizëm, Bill Sage, prezantoi Shërbimin Korrektues të Kosovës dhe Njësinë e Inteligjencës së këtij shërbimi si një model suksesi. Ai vlerësoi arritjet e njësisë në rritjen e ndjeshme të nivelit të sigurisë, duke e përshkruar atë si një histori suksesi dhe një shembull të mirë për rajonin dhe më gjerë.

Konferenca po shërben si një platformë e rëndësishme për shkëmbimin e ideve dhe përvojave ndërkombëtare në fushën e shërbimeve korrektuese, duke nxjerrë në pah rolin e Kosovës si një kontribuues i rëndësishëm në këtë sektor.

SHKK-ja falënderon Ambasadën Amerikane (INL dhe ICITAP) për mbështetjen e vazhdueshme dhe asistencën e ofruar nga zyrtarët e lartë, Bill Sage dhe Frenk Karam.