Në Iran, të gjitha institucionet arsimore do të mbeten të mbyllura deri në njoftim të mëtejshëm, ndërsa në Izrael kufizimet e gjendjes së jashtëzakonshme janë zgjatur deri më 30 qershor, raportojnë mediat iraniane, transmeton Anadollu.

Kryeqyteti i Iranit, Teherani, do të hapë stacionet e metrosë 24 orë në ditë nga nata e së dielës që njerëzit t’i përdorin si strehimore, njoftoi një zëdhënës i qeverisë në televizionin shtetëror iranian.

Ndërkohë, kreu i këshillit të Teheranit tha se meqenëse qytetit i mungojnë strehimore kundër bombave, civilët duhet të përdorin tunele dhe bodrume.

“Për fat të keq, ne në Teheran dhe në qytetet tona të tjera nuk kemi strehimore,” u tha Mehdi Chamran gazetarëve të dielën. “Ne duhet të punojmë për të pasur strehimore tani; mund të përdorim planet që kishim më parë.”

Chamran tha se shifrat e viktimave në Izrael janë më të ulëta pasi ai vend ka strehimore kundër bombave dhe mban stërvitje të rregullta në gatishmëri për sulme të ardhshme.

“Në Teheran nuk kishte strehimore, njerëzit shkonin në bodrume,” tha ai, duke shtuar se metroja mund të përdoret si strehim “në krizë ekstreme”, por se “do të na duhej ta mbyllnim sistemin.”

“Ne mund të përgatisnim edhe parkingje nëntokësore, të ngjashme me kur Sadami na bombardoi,” tha Chamran, duke iu referuar ish-udhëheqësit irakian Sadam Husein dhe luftës së viteve 1980.

Kryeministri izraelit Benjamin Netanyahu paralajmëroi në një video-adresim të shtunën se Izraeli do të “sulmojë çdo vend dhe çdo objektiv të regjimit të Ajatollahut”.

Irani ka kërcënuar të intensifikojë sulmet e tij nëse Izraeli vazhdon armiqësitë.