I arrestuari i dyshuar për të shtënat vdekjeprurëse në Oslo besohet të jetë një islamist i radikalizuar me një histori të sëmundjes mendore, tha të shtunën shërbimi inteligjent PST i Norvegjisë.

Siç bëhet e ditur, i dyshuari, emri i të cilit nuk u bë i ditur nga policia, është i njohur për shërbimet e sigurisë që nga viti 2015.

Në sulmin e së shtunës mbetën të vrarë dy persona derisa 21 të tjerë u plagosën. Viktimat u qëlluan brenda dhe jashtë lokalit homoseksualësh London Pub, pranë klubit të xhazit Herr Nilsen dhe një pijetore tjetër.

I dyshuari është një 42-vjeçar me shtetësi norvegjeze por me origjinë iraniane.

Të vdekurit ishin dy burra të moshës 50 dhe 60 vjeç, tha policia në një deklaratë.

“Gjithçka tregon se ky ka qenë një sulm nga një ekstremist islamik”, tha kryeministri norvegjez Jonas Gahr Stoere në një konferencë shtypi.

Të shtunën në Oslo do të mbahej parada vjetore e krenarisë por u anulua zyrtarisht me këshillën e policisë.

Por pavarësisht kësaj, qindra njerëz marshuan pranë vendit të ngjarjes më vonë gjatë ditës, duke bërtitur: “Ne jemi këtu, ne jemi të çuditshëm, ne nuk do të zhdukemi!”