Një nga vendimet e para që do të marrë kreu i PD Sali Berisha nëse vjen në pushtet është heqja e taksës dhe traut për Rrugën e Kombit. Kështu tha Berisha gjatë një komunikimi online me qytetarët në “Facebook”.

“Edi Rama vendosi atë taksë për të shprehur urrejtjen e tij ndaj ndërtimit të asaj rruge. Ai vendoi çadra për të bllokuar hapjen e tunelit kombëtar. Taksa dhe trau do të hiqen që në muajin e parë të qeverisjes tonë.”, tha ai.

Protestat e gjithanshme për të rrëzuar qeverinë, Berisha, tha se do të nisin së shpejti.

“Polarizimi në vend po rritet me shpejtësi dhe shtresa e mesme po shkon drejt asgjësimit. Edi Rama votën nuk e pranon dhe përmbysja në përbërjen e shtresave të shoqërisë ka si shkak themelor mospranimin e votës nga Edi Rama. Ju garantoj se protestat do të nisin shumë shpejt”, tha Berisha.

“Ato janë shtyrë dhe shtyrja bëhet e padurueshme në shumë aspekte. Ndaj, protestat dhe grevat e gjithanshme do të jenë rrugët për të kthyer në Shqipëri shpresën dhe votën e lirë”, shtoi kreu demokrat.

Kreu i PD-së është shprehur se gabimi më i pafalshëm historik i Partisë Demokratike është bërë me datën 27 Prill të vitit 2021, ku sipas kreut të demokratëve, Basha nuk thirri për protesta, por futi PD në një spirale shkatërrimtare.

“Edi Rama ka blerë, ka dhunuar dhe ka përdorur të gjithë shtetin për të rrëmbyer votat. Gabimi më i pafalshëm historik i PD është bërë me datën 27 Prill të 2021, kur pas atyre zgjedhjeve masivisht të dhunuara, kreu i kësaj partie nuk thirri për protesta dhe rrëzimin e Ramën, por pasi ishte marrë peng nga Rama, futi PD në një spirale shkatërrimtare nga e cila u desh shumë kohë për të dalë”.