Deputetja e Partisë Demokratike të Kosovës, Eliza Hoxha, njëherësh iniciatore e platformës “Liria ka emër”, në marshin e organizuar të dielën, ka thënë se ashtu sikurse sot, është e bindur se sheshet e Prishtinës do të mbushen me njerëz sërish kur ish-pjesëtarët e Ushtrisë Çlirimtare të Kosovës do të kthehen nga Haga ku edhe po gjykohen për krime lufte.

Teksa mori fjalën para mijëra njerëzve që po marrin pjesë në këtë marsh, Hoxha ka thënë se në këtë ditë 24 vjet më parë, Prishtina ishte shndërruar në “qytet fantazmë” pasi njerëzit ishin dëbuar nga forcat serbe.

“Sot 24 vjet më parë Prishtina ishte shndërruar në qytet fantazmë. Lumi i njerëzve të dëbuar nga shtëpitë e tyre nga ushtria dhe paramilitarët serbë, kishin mësyrë stacionin e vjetër të trenit. Ai stacion që kishte qenë i mbyllur për më shumë se 10 vjet atë kohë, u hap atë ditë për të na dëbuar jashtë Kosovës në një rrugë pa kthim, por ne u kthyem e këto sheshe u mbushën prapë për të festuar çlirimin e pavarësinë e Kosovës”, ka thënë ajo.

Hoxha më tej tha se fitorja e Kosovës nuk do të shënohej pa guximin, luftën dhe vetëmohimin e pjesëtarëve të UÇK-së.

“Si fotografe e re atë botë i mbaj mend shkrepjet e fytyrave me lot gëzimi kur të gjithë bashkë shënonim ato fitore të mëdha. E këto fitore epokale do të ishin të pamundura pa guximin, luftën dhe vetëmohimin e djemve dhe vajzave më të mira të këtij vendi të Ushtrisë Çlirimtare të Kosovës. Gjatë këtyre dy javëve anë e kënd Kosovës, bashkë me Ismailin e kam rijetuar historinë tonë. E kam ndjerë në dhimbjen e nënës Ferdonije, në guximin e Shyhretes dhe Vasfijes, në stoicizmin e Fahrije Hotit, në qëndresën e bacës Bajram. Përulësisht ju falënderoj nga zemra të gjithë juve që jeni me ne këtu sot. UÇK-ja na bashkon pa dallim, thirrja për drejtësi na bashkon e unë jam e bindur që ky shesh do të buçojë sërish në ditën e kthimit të çlirimtarëve tanë”, ka thënë ajo.

Edhe iniciatori tjetër i këtij marshi, Ismail Tasholli, ka marrë fjalën para qytetarëve, duke thënë se UÇK-ja është emërues i përbashkët dhe vlera më sublime që vendi ka krijuar.

“Unë kam qenë 13-vjeç kur për herë të parë kam parë në uniformë ushtarin e UÇK-së, axhën Ragip. Si fëmijë nuk arrija të kuptojë krejt peshën e asaj që po ndodhte. Por një gjë ishte e qartë për mua atëbotë. Si në filma epik ishte një betejë mes të mirës dhe të keqes. Mes lirisë e robërisë. Mes jetës dhe vdekjes. Unë sikurse të gjithë moshatarët e mi e kam ndierë në palcë pabarazinë mbylljen e shkollave dëbimin nga shtëpia. E ushtari i UÇK-së atë ditë në sytë e mi mori trajtën e një superheroi magjik. Luftëtari i së mirës lirisë dhe jetës. Vërtetë të tillë ishin pjesëtarët e UÇK-së. Unë ju falënderoj nga zemra që jeni bashkuar thirrjes sonë për drejtësi. UÇK-ja është emëruesi ynë i përbashkët, vlera më sublime që e kemi krijuar si komb. Ne si komb njëzëri bashkë siç na ka hije marshojmë kundër ndryshimit të historisë, marshojmë për drejtësi. Hashim Thaçi, Kadri Verseli, Jakup Krasniqi e Rexhep Selimit e fillojnë nesër betejën e radhës, betejën për të vërtetën e drejtësinë. Si gjithmonë do të kthehen fitimtarë e faqebardhë. Ne sot u bëmë bashkë dhe siç e shihni doli dielli”, ka thënë ai.

Flaka Fazlija, e bija e dëshmorit Fatmir Fazlija, ka thënë se nga Prishtina po shprehet bindja se Ushtria Çlirimtare e Kosovës nuk ka kryer krime dhe nuk është në asnjë formë organizatë kriminale.

“Çmimi i lirisë shpeshherë kuptohet i shkëputur nga pasojat e ndikimet e mëpastajmë që sjellë. Çdo popull duhet të themi se krijon ndërgjegjen e vet kombëtare dhe mbahet pas heroizmit të figurave të veta, përpjekjet e secilit shtet për të ruajtur gjuhën, identitetin dhe kulturën e tyre duhet të vlerësohet por jo në secilin rast njerëzit e kanë të lehtë. Për popullin tonë fatbardhësisht lufta e fundit në Kosovë shënon një përpjekje për t’i kontribuuar paqes, së drejtës dhe për t’i dhënë fund gjenocidit, masakrave dhe të gjitha dimensioneve të ushtruar mbi civilët shqiptarë. Ne nga Prishtina solidarizohemi dhe shprehim bindjen tonë të patundur se UÇK-ja nuk ka kryer krime dhe nuk është në asnjë formë një organizatë kriminale, por një organizatë çlirimtare. Njerëz të cilët dënesën e dhimbjeve tona kolektive e kthyen në zë të fuqishëm të cilin e dëgjoi e gjithë bota, e në veçanti SHBA-ja, NATO-ja e BE-ja”, ka thënë ajo.