Përzgjedhësi i Zvicrës, Murat Yakin, ka kritikuar ashpër vendimin e gjyqtarit për përjashtimin e Breel Embolo në humbjen 3:1 ndaj Argjentinës në çerekfinalen e Kupës së Botës.

Embolo u ndëshkua me kartonin e dytë të verdhë në minutën e shtatëdhjetë e dytë për simulim, pasi fillimisht gjyqtari kishte ndëshkuar Leandro Paredes për faull. Pas një rishikimi të gjatë me VAR, vendimi u ndryshua dhe sulmuesi zviceran u përjashtua nga loja.

Yakin nuk e ka fshehur pakënaqësinë.

“Nuk kishte asnjë arsye për t’i dhënë karton të verdhë. Ishte një situatë e padëmshme dhe duhej të vazhdohej loja. U ndëshkuam nga një rregull që është i papranueshëm. Nuk e kuptoj fare. Nuk ka lidhje me futbollin”, ka deklaruar ai.

Sipas trajnerit zviceran, vendimi ndryshoi rrjedhën e takimit në momentin kur Zvicra po kontrollonte lojën pas golit të barazimit të Dan Ndoyes.

“Ne kishim momentumin dhe po e kontrollonim ndeshjen. Pastaj u ndëshkuam nga një vendim që nuk e kuptoj. Djemtë e mi janë heronjtë e vërtetë”, ka shtuar Yakin.

Argjentina shfrytëzoi epërsinë numerike dhe shënoi dy gola në minutat e fundit të vazhdimeve, përmes Julian Alvarez dhe Lautaro Martínez, duke siguruar kualifikimin në gjysmëfinale.

Edhe mesfushori Remo Freuler ka kërkuar sqarime nga FIFA për vendimin e VAR-it.

“Jam shumë krenar për skuadrën. Të gjithë dhamë maksimumin. Nuk e kuptoj se si VAR-i mund të marrë një vendim të tillë. FIFA duhet të na japë shpjegime”, ka thënë ai.

Pas kartonit të kuq, Embolo u largua nga fusha mes lotësh, ndërsa u ngushëllua nga bashkëlojtarët.

Yakin e ka mbrojtur sulmuesin..

“Ai u faullua shumë herë gjatë ndeshjes dhe pati momente shumë të mira. Nuk e fajësoj aspak. Është i shkatërruar emocionalisht sepse nuk mundi ta ndihmonte më ekipin. Ishte një gabim i arbitrimit”, ka thënë tekniku zviceran.