Trajneri i Manchester City, Pep Guardiola, e ka pranuar përgjegjësinë për formën e dobët të skuadrës së tij këtë sezon, pasi kampioni në fuqi ka fituar vetëm dy nga dhjetë ndeshjet e fundit në Premier League.

Kjo ecuri e dobët e ka lënë City në vendin e gjashtë në renditje me tridhjetë e një pikë nga nëntëmbëdhjetë ndeshje, katërmbëdhjetë pikë më pak se lideri Liverpool, që ka një ndeshje më pak të zhvilluar.

Guardiola ka thënë se mungesa e rezultateve është pjesërisht pasojë e lëndimeve të shumta në skuadër.

Mes lojtarëve të dëmtuar janë fituesi i Topit të Artë, Rodri, portieri Ederson, dhe mbrojtësit John Stones dhe Ruben Dias, të cilët kanë qenë jashtë fushës për periudha të ndryshme kohore.

“Faji është i imi, jo i lojtarëve. Ata natyrshëm e humbën paksa ritmin dhe kjo është normale”, ka thënë Guardiola. “Një gjë e tillë ndodhi edhe sezonin e kaluar. Unë fajësoj veten. Nuk e them këtë për të marrë komplimente, por sepse është e vërteta. Unë e udhëheq atë grup lojtarësh dhe nuk kam mundur t’i motivoj si duhet. Ky është realiteti”.

City do të synojë të rikthehet te fitorja në ndeshjen e ardhshme kundër West Ham United, pas triumfit 2-0 kundër Leicester City javën e kaluar.