Një burrë dhe një grua janë arrestuar në Ferizaj nën dyshimin për deklarim të rremë. Sipas Policisë së Kosovës, një grua 21-vjeçare me shtetësi të huaj dhe një burrë 29-vjeçar kanë inskenuar një përleshje. Në shtëpinë e tyre janë gjetur thika dhe gjurmë gjaku.

Njoftimi i Policisë:

Më 29.10.2024, rreth orës 23:00, stacioni policor në Ferizaj pranoi një informatë nga Qendra Emergjente në Ferizaj për një grua 21-vjeçare, shtetase e huaj që po trajtohej aty. Policia menjëherë shkoi në qendër, ku u raportua se gruaja dyshohej të ishte sulmuar nga një person tjetër me një mjet të mprehtë në rrugën “Tahir Sinani” dhe se sulmuesi ishte larguar në drejtim të panjohur.

Njësia e Hetimeve u angazhua në rast nën autorizimin e prokurorit të shtetit dhe intervistoi bashkëshortin e saj, një 29-vjeçar kosovar, i cili fillimisht konfirmoi versionin e sulmit nga një person tjetër. Rasti u klasifikua fillimisht si “Lëndim i lehtë trupor.”

Gjatë hetimeve dhe ekzaminimit të vendit të ngjarjes, nuk u gjetën prova që mbështesnin raportimin fillestar. Hetuesit vizituan shtëpinë e çiftit dhe gjetën gjurmë gjaku dhe mjete të mprehta, të cilat dyshohet se janë përdorur gjatë një përleshje mes tyre. I dyshuari, E.B., që kishte po ashtu lëndime trupore, pranoi se ai dhe bashkëshortja kishin inskenuar rastin dhe kishin bërë deklarime të rreme.

Pas marrjes së tretmanit mjekësor të nevojshëm, të dyshuarit u shoqëruan në stacionin policor në Ferizaj. Me vendim të prokurorit, rasti u ricilësua si “Lëndim i lehtë trupor”, “Dhunë në familje” dhe “Deklarim i rremë,” ndërsa të dyshuarit janë ndaluar për 48 orë për procedura të mëtejshme hetimore.