Çmimi i Bitcoin-it dhe kriptovalutave të tjera filloi të rritej të enjten, i nxitur nga raportet se investitorët institucionalë po tërhiqnin kapital në fondet e tregtuara në bursë të fokusuara në asetet digjitale, sipas Barron’s.

Prurjet në ETF-të e Bitcoin-it kanë arritur pothuajse 50 miliardë dollarë, sipas një raporti nga SosoValue. Ky është një tjetër tregues se kriptovalutat po mbajnë vëmendjen e investitorëve tradicionalë dhe po konsolidohen si një klasë asetesh.

Bitcoin (BTCUSD -0.14 për qind) u rrit me 1.7 për qind gjatë 24 orëve të fundit duke arritur çmimin 109,758 dollarë. Ky është afër nivelit rekord prej 111,000 dollarësh.

Ethereum (ETHUSD +0.17 për qind), kriptovaluta e dytë më e madhe, u rrit me 5.8 për qind dhe XRP (XRPUSD +1.76 për qind) fitoi 4.8 për qind. Solana (SOLUSD +0.96 për qind) u rrit me 3.6 për qind dhe Dogecoin (DOGEUSD +1.60 për qind) avancoi me 7.6 për qind.

Rritjet e çmimeve ndodhën edhe pse tregjet e aksioneve ishin përgjithësisht të qëndrueshme para hapjes së bursës. Kriptovalutat zakonisht tregtohen më së shumti në përputhje me aksionet teknologjike me rrezik më të lartë, por kontratat e së ardhmes që ndjekin Nasdaq 100 ishin rritur me më pak se 0.1 për qind.

Lajmet e fundit për marrëveshjen tregtare të presidentit Donald Trump me Vietnamin dhe lehtësimi i kufizimeve për eksportet e softuerëve të dizajnimit të çipave drejt Kinës, mund të ndihmojnë aksionet teknologjike ndërsa tregjet i drejtohen një dite të shkurtuar tregtimi. Bursa do të jetë e mbyllur të premten për shkak të festës së 4 Korrikut.

Çdo shenjë se Rezerva Federale do t’i ulë normat e interesit më herët se sa pritej, mund të japë gjithashtu një shtytje – të dhënat e radhës të rëndësishme janë për pagat e muajit qershor, që publikohen të enjten në mëngjes.