Kryetari i Asociacionit të Komunave të Kosovës, Agim Aliu, i cili është edhe nënkryetar i NALAS (Rrjeti i Autoriteteve Lokale të Evropës Juglindore), së bashku me Sazan Ibrahimin, drejtor ekzekutiv i AKK-së, po marrin pjesë në takimin e Komitetit Evropian të Rajoneve ‘Ditët e Zgjerimit” që po mbahet në Bruksel.

Sipas njoftimit të Asociacionit të Komunave të Kosovës, në këtë takim Agim Aliu, duke folur në sesionin  “Autoritetet lokale dhe rajonale në procesin e zgjerimit – forcimi i demokracisë lokale”, tha se “për t’i kryer me sukses reformat e lidhura me procesin e anëtarësimit, të gjitha nivelet qeveritare duhet ta koordinojnë zbatimin e aktiviteteve reformuese që racionalizojnë kërkesat, standardet dhe rregullat e BE-së në një mënyrë që politikat kombëtare të zbatohen në nivel lokal sipas parimit të subsidiaritetit”.

Më tutje thuhet se pushtetet lokale nuk mund të reduktohen në ekzekutues të thjeshtë të urdhrave të qeverisë qendrore, por duhet të përfshihen aktivisht në koordinimin e mënyrës më të mirë të mundshme për të siguruar që procesi i reformës të arrijë të gjitha nivelet e qeverisjes.

“Sot vërejmë një tendencë ricentralizimi dhe tipare të lidershipit autoritar në Ballkanin Perëndimor që duhet të rikthehen nga procesi i reformës në BE dhe dinamika e anëtarësimit në BE, e cila u ndal për një kohë shumë të gjatë. Ka sfida për t’u përballur me qëndrimet qendrore të qeverisë që i konsiderojnë qeveritë lokale jo si shtytës të përbashkët për reforma, as nxitës të barabartë për iniciativa të tilla si Plani i Rritjes për Ballkanin Perëndimor, Plani Ekonomik dhe i Investimeve dhe Agjenda Digjitale dhe e Gjelbër, por më tepër si pranues dhe ekzekutues të urdhrave të qeverisë qendrore”, thuhet në njoftimin e AKK-së.

Po ashtu, demokracia lokale duhet të forcohet për t’i përballur këto tendenca me vlera demokratike si në nivel institucional, po ashtu edhe në nivel qytetar.

NALAS-i bën thirrje për një mekanizëm të paracaktuar bashkëpunimi dhe dialogu me asociacionet e qeverisjes lokale dhe rrjetet e tyre rajonale për ta përmirësuar shkëmbimin me institucionet e BE-së dhe qeveritë kombëtare të informacionit përkatës për vlerësimin dhe vendimmarrjen e duhur, për ta promovuar shkëmbimin e njohurive dhe për ta rritur efektin e të mësuarit – veçanërisht lidhur me procesin e reformës në kuadër të procesit të zgjerimit.

Duke folur rreth programit të ndihmës financiare të BE-së për Ballkanin Perëndimor, kryetari Aliu tha se “të gjitha programet për ngritjen e kapaciteteve të administratës në nivel qendror duhet të jenë paralele dhe të pasqyrohen në nivel lokal dhe rajonal. Administrata publike në të gjitha nivelet duhet të përgatitet në mënyrë adekuate për anëtarësimin në BE.

NALAS është i përkushtuar për ndërtimin e kapaciteteve të stafit për t’u marrë me reformat e politikave në lidhje me integrimin në BE si dhe rritjen e kapaciteteve të qeverive lokale për menaxhimin e projekteve për të rritur kapacitetet absorbuese për fondet e BE-së bazuar në partneritet dhe shkëmbim njohurish mes kolegëve”, tha, ndër të tjera, kryetari i AKK-së, Agim Aliu.

Komiteti Evropian i Rajoneve është një organ këshillimor i Bashkimit Evropian i përbërë nga përfaqësues të zgjedhur në nivel lokal dhe rajonal që vijnë nga të 27 shtetet anëtare. Nëpërmjet Komitetit autoritetet lokale janë në gjendje ta japin mendimin e tyre mbi legjislacionin e BE-së që ndikon drejtpërdrejt në rajone dhe qytete evropiane, thuhet në njoftimin e AKK-së. /Kosova.info/