Ministrja e Arsimit, Evis Kushi në ditën e parë të vitit të ri shkollor është ndalur të nje tjetër fenomen që po ndodh në vendin tonë që është largimi i të rinjve jashtë vendit. Sipas ministres të rinjtë shqiptarë po largohen për studime apo punësime, në shtetet ku popullsia po shkon drejt plakjes.

Sipas saj, kjo tendencë nuk është vetëm në Shqipëri, por në Ballkan.

“Përveç krizës globale, ne këtu në Shqipëri po përballemi edhe me një tendencë tjetër, një sfidë tjetër. Një tendencë në fakt me të cilën po përballet i gjithë rajoni ballkanik. Një pjesë e të rinjve largohen nga rajoni për studime apo për punësim, drejt vendeve perëndimore siç është Gjermania, por jo vetëm.

Vende të cilat duke qenë drejt plakjes së popullsisë, e duke pasur nevoja në rritje në tregun e punës, kanë hapur dyert për të rinjtë tanë, veçanërisht për mjekët, për infermierët, por edhe për profesione të tjera të kohës”, theksoi ajo.