Pas konfirmimit të disa rasteve të sëmundjes Lija e Dhenve dhe Dhive (Sheep and Goat Pox) në komunat Ferizaj, Kaçanik, Shtërpcë dhe Viti, si dhe rrezikut të përhapjes së mëtejshme të saj, Agjencia e Ushqimit dhe Veterinarisë (AUV) u bën thirrje të gjithë fermerëve të deleve dhe dhive që të rrisin vigjilencën dhe të zbatojnë me përpikëri masat e biosigurisë.

Bazuar në situatën epidemiologjike të krijuar, AUV kërkon nga fermerët të zbatojnë këto masa parandaluese:

• Mos lëvizni delet dhe dhitë nga ferma pa autorizimin e veterinerit zyrtar.
• Kufizoni hyrjen e personave dhe automjeteve të paautorizuara në fermë.
• Shmangni kontaktin e kafshëve tuaja me tufat e fermave të tjera.
• Pastroni dhe dezinfektoni rregullisht objektet, pajisjet dhe mjetet e transportit.
• Çdo kafshë e sapoblerë të mbahet e ndarë nga tufa për një periudhë vëzhgimi.
• Kontrolloni çdo ditë gjendjen shëndetësore të kafshëve.

Fermerët duhet të jenë të kujdesshëm ndaj shenjave klinike si:

• temperaturë e lartë;
• puçrra ose plagë në lëkurë, gojë, hundë apo gjinj;
• rrjedhje nga sytë ose hunda;
• mungesë oreksi, dobësi ose ngordhje të kafshëve.

Në rast të vërejtjes së këtyre shenjave, fermerët duhet të njoftojnë menjëherë veterinerin privat ose inspektorët e AUV-së. Nuk duhet të tentojnë trajtimin apo lëvizjen e kafshëve të dyshuara.

Bashkëpunimi i fermerëve është thelbësor për parandalimin e përhapjes së sëmundjes dhe mbrojtjen e tufave në të gjithë vendin.

AUV sqaron se Lija e Dhenve dhe Lija e Dhive nuk transmetohet te njerëzit dhe nuk paraqet rrezik për shëndetin publik. Kjo është një sëmundje me ndikim ekonomik, e cila mund të shkaktojë humbje për fermerët dhe ekonominë e vendit. /Kosova.info/