Kryetari i Prishtinës, Përparim Rama, ka ftuar qytetarët që t’i bashkohen festimeve për Ditën e Çlirimit të Prishtinës, të cilat do të organizohen më 11 qershor në stadiumin Stadiumi Fadil Vokrri.

Sipas Ramës, në këtë përvjetor të veçantë, në fushën e stadiumit do të zbresin yje të sportit, muzikës dhe jetës publike duke sjellë një spektakël për të gjitha grupmoshat.

Ai u bëri thirrje qytetarëve që të marrin familjarët, miqtë dhe fëmijët për të festuar së bashku këtë ditë të rëndësishme për kryeqytetin.

Aktiviteti organizohet nën patronatin e Kryeqytetit, ndërsa hyrja do të jetë falas për të gjithë pjesëmarrësit.

Festimet do të nisin më 11 qershor në ora 18:00 në stadiumin “Fadil Vokrri” në Prishtinë. /Kosova.info/