Memli Krasniqi nga PDK, ka ndarë një mesazh emocional në prag të një momenti të rëndësishëm për futbollin kosovar duke rikujtuar rrugëtimin që nga ndeshja e parë miqësore zyrtare e Kosova në vitin 2014.

Përmes një reflektimi personal, Krasniqi kujton dy figurat kyçe që, sipas tij, i dhanë drejtim këtij rrugëtimi historik: një që “ia hapi Kosovës dyert e botës” dhe tjetrin që “i dha shpirt dhe drejtim futbollit tonë” duke nënvizuar rolin e madh të legjendës së ndjerë Fadil Vokrri.

“Sonte, 12 vite më vonë, Kosova luan për një kapitull tjetër historie. Për ëndrrën e madhe amerikane”, ka shkruar ai duke e cilësuar ndeshjen si një hap vendimtar drejt një objektivi që dikur dukej i paarritshëm.

Krasniqi theksoi se përballja zhvillohet në stadiumin që mban emrin e Vokrrit duke e kthyer këtë moment në një homazh të veçantë për ish-kryetarin e Federatës së Futbollit të Kosovës. Ai e përshkroi këtë si një “mision të shenjtë” për lojtarët që zbresin në fushë.

Në fund të mesazhit të tij, ai shprehu emocionet personale dhe respektin për Vokrrin: “Fadil, kjo është edhe për ty. Për vizionin tënd. Për besimin tënd.”

Mesazhi u përmbyll me thirrjen: “Zoti qoftë me ne! Forca Kosovë!” 🇽🇰 /Kosova.info/