Ambasadori i Gjermanisë në Kosovë, Rainer Rudolph, së bashku me atashen kulturore Catalina Heine, kanë pritur në një drekë të përbashkët të rinjtë e vlerësuar me çmimet Harmony Hero Awards, për iniciativat e tyre në promovimin e harmonisë, dialogut dhe paqes në komunitet.

Çmimet Harmony Hero Awards vlerësojnë iniciativa të udhëhequra nga të rinjtë që kontribuojnë në ndërtimin e paqes, mirëkuptimit dhe bashkëjetesës në shoqëri. Këto çmime njohin veprime kuptimplota, të mëdha apo të vogla, që bashkojnë njerëzit, nxisin dialogun dhe kontribuojnë në pajtim, përmes angazhimit komunitar, shprehjes kreative apo qasjeve inovative.

Përmes promovimit të këtyre iniciativave, Harmony Hero Awards synojnë të frymëzojnë edhe më shumë të rinj që të angazhohen aktivisht në ndërtimin e një shoqërie paqësore dhe gjithëpërfshirëse.

Si pjesë e këtij vlerësimi, fitues nga vitet e kaluara janë ftuar në këtë drekë me Ambasadorin Rudolph dhe atashen kulturore Heine, ku u theksua rëndësia e kontributit të tyre dhe u inkurajua vazhdimi i dialogut dhe angazhimit të tyre në komunitet.

Takimi u cilësua si një shenjë mbështetjeje për rolin e të rinjve në ndërtimin e paqes dhe forcimin e lidhjeve ndërmjet komuniteteve në Kosovë. /Kosova.info/