Trafiku Urban ka njoftuar sot se të gjithë qytetarët që posedojnë bileta mujore do të kompensohen me 9 ditë shtesë të vlefshmërisë, për shkak të ndërprerjes së shërbimit gjatë protestës së zhvilluar nga data 24 nëntor deri më 2 dhjetor 2025.

Sipas njoftimit, kompensimi do të aplikohet vetëm pas procesit të vulosjes, të cilin qytetarët duhet ta kryejnë në një nga kioskat e ndërmarrjes. Pas vendosjes së vulës zyrtare, sistemi do të zgjatë automatikisht vlefshmërinë e biletës mujore për ditët e humbura.

Për zgjatjen e vlefshmërisë, qytetarët duhet të paraqiten me biletën aktuale mujore në cilëndo kioskë të Trafikut Urban, ku punëtori përgjegjës vendos vulën e nevojshme për aktivizimin e kompensimit.

Kioskat ku kryhet vulosja dhe oraret e punës:

1. Kioska prapa Objektit të Komunës (te “Plepat”)

E hënë – E shtunë: 07:00 – 21:00

E diel: 08:00 – 16:00

2. Kioska në “Kodra e Diellit” (te “Banesat e Bardha”)

E hënë – E premte: 07:00 – 21:00

E shtunë: 07:00 – 14:00

3. Kioska në Bulevardin “Bill Kllinton” (afër nënkalimit)

E hënë – E shtunë: 07:00 – 21:00

E diel: 08:00 – 16:00

Trafiku Urban ka theksuar se kompensimi nuk hyn në fuqi pa vulosje duke i bërë thirrje qytetarëve që të jenë të kujdesshëm dhe të kryejnë procedurën sa më shpejt. Ndërmarrja ka falënderuar qytetarët për mirëkuptimin gjatë periudhës së protestës. /Kosova.info/