Ekipet e kërkimit nxorën të premten 25 trupa nga një varr masiv në një periferi të Damaskut. Besohet se vendi përmban të paktën 175 trupa. Zyrtarët sirianë thonë se viktimat u vranë nga forcat e Assadit në një pritë, teksa po iknin nga lindja e Ghoutas gjatë luftës së fundit civile.

Trupat u gjetën në një fushë bujqësore në periferi të Otaibës dhe, sipas autoriteteve, u përkisnin njerëzve që ishin vrarë në një pritë nga forcat e atëhershme të presidentit Bashar Assad, ndërsa po iknin nga enklava e rrethuar e Ghoutas lindore, e cila në atë kohë ishte nën kontrollin e forcave opozitare, raporton euronews.

Ky është një nga gjurmët më të zymta që ka dalë në dritë nga lufta civile gati 14-vjeçare e vendit, e cila përfundoi me rrëzimin e ish-presidentit Bashar Assad në një ofensivë të shpejtë të rebelëve në dhjetor.

Anëtarë familjesh me të afërm të zhdukur erdhën në vendin e ngjarjes me shpresën për të gjetur përgjigje. Mes tyre ishte Samira Alloush, e cila po kërkonte të birin, Anas Ahmad Alloush, që kishte qenë mes të rrethuarve në Ghouta. Ai ishte 19 vjeç kur u zhduk në vitin 2014.

Nëna kishte shpresuar se ai do të ishte gjallë në burg dhe se do të dilte kur burgjet të hapeshin pas rënies së Assadit. Por, mes rrobave të mbuluara nga balta, ajo njohu xhupin e të birit. “Kisha shpresë se do të dilte nga burgu dhe do të uleshim sërish bashkë,” tha ajo me lot në sy.

Amer Fahed, komandant i operacioneve në rrethinën e Damaskut për grupin e mbrojtjes civile të njohur si Helmetat e Bardha, tha se nuk do të fillojnë ende të gërmojnë ose të zhvarrosin varrin masiv derisa të përcaktohet një mekanizëm i posaçëm nga Komisioni Kombëtar për Personat e Zhdukur.

Numri i trupave mund të jetë më i lartë

Ammar Al-Issa, një zyrtar i komisionit të personave të zhdukur, i pranishëm në vendngjarje, tha se numri i trupave mund të jetë më i madh, pasi besohet se 200 deri në 300 persona u vranë në pritën e shkurtit 2014.

Qindra trupa janë gjetur në varre masive të shpërndara nëpër vend që nga rënia e Assadit, por shumë të tjera ka gjasa të mbeten ende të pazbuluara. Vlerësohet se rreth 150,000 njerëz janë arrestuar ose janë zhdukur në Siri që nga viti 2011, kur protestat masive kundër qeverisë u përballën me një shtypje të ashpër dhe u shndërruan në luftë civile. Shumë prej tyre ka gjasa të jenë varrosur në varre masive pa shenja.