Vendimi i presidentit francez Emmanuel Macron, për të njohur një shtet palestinez, që nxiti veprime të ngjashme nga vende të tjera perëndimore, ka zemëruar Izraelin dhe aleatin e tij amerikan, duke vendosur zgjidhjen me dy shtete përsëri në qendër të përpjekjeve diplomatike për të ndalur luftën shkatërruese në Gaza.

Në një letër të dërguar javën e kaluar kryeministrit izraelit, Benjamin Netanyahu, Macron shkroi se “vendosmëria jonë për të parë popullin palestinez me shtetin e vet buron nga bindja jonë se paqja e qëndrueshme është thelbësore për sigurinë e shtetit të Izraelit”.

Ai shtoi se përpjekjet diplomatike të Francës “rrjedhin nga zemërimi ynë ndaj katastrofës njerëzore të tmerrshme në Gaza, për të cilën nuk ka asnjë justifikim.” Izraeli të premten shpalli qytetin më të madh të Gazës zonë lufte, ndërsa numri i të vrarëve ka kaluar 63,000 palestinezë, sipas Ministrisë së Shëndetësisë së territorit, që nga fillimi i luftës më 7 tetor 2023 me sulmin e Hamasit ndaj Izraelit, raporton AP.

Franca, Mbretëria e Bashkuar, Kanadaja, Australia dhe Malta kanë thënë se do të formalizojnë angazhimin e tyre gjatë mbledhjes vjetore të liderëve botërorë në Asamblenë e Përgjithshme të OKB-së, që fillon më 23 shtator. Disa vende të tjera, përfshirë Zelandën e Re, Finlandën dhe Portugalinë, po konsiderojnë një hap të ngjashëm.

Izraeli dhe SHBA thonë se njohja e një shteti palestinez inkurajon militantët.

Letra e Macron vjen pasi Netanyahu e akuzoi atë se “po ushqen zjarrin e antisemitizmit” me thirrjen e tij për një shtet palestinez, komente që Macron i dënoi si “të neveritshme.”

Javën e kaluar, ambasadori amerikan në Francë, Charles Kushner, gjithashtu shkroi një letër duke argumentuar se “veprimet për njohjen e një shteti palestinez inkurajojnë ekstremistët, ushqejnë dhunën dhe rrezikojnë jetën e hebrenjve në Francë.” Kushner u thirr nga Ministria e Jashtme e Francës dhe u përfaqësua në mungesë nga zëvendësi i tij.