Irani nisi një breshëri të re sulmesh me raketa kundër objektivave izraelite të hënën, sipas një raporti nga media shtetërore.

“Korpusi i Gardës Revolucionare Islamike (IRGC) nisi një valë të re sulmesh me raketa – e teta që nga e premtja – kundër territoreve të pushtuara (Izraelit)”, tha televizioni shtetëror Press TV, transmeton AA.

Kanali 12 izraelit tha se sirenat e sulmeve ajrore u dëgjuan në rajonet Haifa, Krayot, Galilee dhe Galilee të Poshtme.

Disa raketa u identifikuan pasi një breshëri raketash u lëshua nga Irani drejt Izraelit verior, ku u dëgjuan interceptime, raportoi e përditshmja Yedioth Ahronoth.

Radioja e Ushtrisë Izraelite raportoi se tre raketa balistike u lëshuan nga Irani, njëra prej tyre u interceptua dhe dy ranë në zona të hapura në veri.

Ushtria izraelite tha se sirenat u dëgjuan në disa zona në Izraelin verior pas identifikimit të raketave të lëshuara nga Irani.

I kërkoi publikut “të hynte në një hapësirë të mbrojtur dhe të qëndronte atje deri në njoftim të mëtejshëm”.

Më vonë, ushtria tha se pas vlerësimit të situatës, Komanda e Frontit të Brendshëm u kërkoi njerëzve se “tani u lejohet të largohen nga hapësirat e mbrojtura”.

Deri më tani nuk është raportuar për viktima.

Tensionet rajonale janë përshkallëzuar që nga e premtja, kur Izraeli nisi sulme ajrore të koordinuara në shumë vende në të gjithë Iranin, duke përfshirë objekte ushtarake dhe bërthamore, duke e shtyrë Teheranin të nisë sulme hakmarrëse.

Autoritetet izraelite thanë se të paktën 24 persona janë vrarë dhe qindra të tjerë janë plagosur në sulmet me raketa iraniane që nga e premtja.