Andy Burnham u konfirmua si lideri i ri i Partisë Laburiste pasi siguroi 379 nominime nga deputetët laburistë, duke qenë kandidati i vetëm që arriti pragun e kërkuar.

Rezultati u shpall zyrtarisht nga kryetarja e Komitetit Ekzekutiv Kombëtar të partisë, Shabana Mahmood, ndërsa njoftimi u prit me duartrokitje të gjata dhe ovacione nga anëtarët e partisë.

Pas shpalljes së rezultatit, Burnham përqafoi bashkëshorten e tij dhe u ngjit në skenë mes një pritjeje entuziaste nga delegatët e konferencës.

Në fjalimin e tij të parë si lider, Burnham tha se synimi i tij është të rikthejë shpresën te komunitetet që prej vitesh presin ndryshim nga politika. Ai deklaroi se dëshiron të jetë një lider për të gjitha pjesët e Mbretërisë së Bashkuar, Anglinë, Skocinë, Uellsin dhe Irlandën e Veriut, duke theksuar nevojën për më shumë bashkëpunim mes komuniteteve, sektorit publik dhe atij privat.

Lideri i ri laburist bëri të ditur se përbërja e kabinetit të tij do të shpallet gjatë ditës së hënë, duke shtuar se prioriteti i tij i parë ishte prezantimi i vizionit dhe programit politik, e jo spekulimet mbi emrat e ministrave të ardhshëm.

Burnham i kushtoi një pjesë të rëndësishme të fjalimit të tij ish-liderit Keir Starmer, duke e falënderuar për drejtimin e partisë në një periudhë të vështirë. Ai tha se nën udhëheqjen e Starmer, Laburistët kaluan nga humbja më e rëndë zgjedhore në një prej fitoreve më të mëdha në historinë e tyre politike.

“Keir e riktheu Partinë Laburiste në pozicionin për të ndryshuar jetën e njerëzve dhe ne i jemi mirënjohës për shërbimin ndaj partisë dhe vendit”, deklaroi Burnham.

Ai shtoi se Britania ndodhet përballë një momenti vendimtar dhe se politika duhet të fokusohet më shumë te zgjidhja e problemeve konkrete, si kujdesi social, përballueshmëria ekonomike dhe përmirësimi i shërbimeve publike, duke e përmbyllur fjalimin me mesazhin se misioni i tij si lider i ri është ?rikthimi i shpresës?.