Sot, më 30 shtator 2024, starton emisioni i ri sportiv “Penallti” në platformën online të Agjencisë së Lajmeve Kosova.info. Ky program shënon një pikë të re për zhvillimin e mediave sportive në Kosovë duke sjellë një format të freskët dhe ndryshe për ndjekësit e sportit.

Emisioni do të moderohet nga gazetari dhe moderatori i njohur Adem Haliti, i cili është gjithashtu i njohur si krijuesi i podcastit të parë sportiv në Kosovë. Me përvojën dhe pasionin e tij për sportin, Haliti synon të sjellë një qasje më të thelluar dhe rrëfimtare mbi zhvillimet sportive në vend dhe më gjerë.

“Penallti” do të fokusohet në tregimet e padëgjuara të sportit kosovar dhe pritet të jetë një platformë për intervista ekskluzive me personalitete sportive. Episodet do të transmetohen çdo të hënë nga ora 22:00.

Mysafiri i parë i emisionit është Muhamet Dragusha, një trajner i njohur dhe me përvojë të madhe në sportin kosovar. Diskutimi i tyre pritet të trajtojë sfidat dhe arritjet e sportit në Kosovë, duke dhënë një pasqyrë të thellë mbi zhvillimet e fundit.

Ky emision pritet të jetë një dritare e re për tifozët dhe profesionistët e sportit, duke kontribuuar në ngritjen e nivelit të diskutimeve sportive në vend. /Kosova.info/